Rika被Winkie音招逼走
前退選港姐劉燕妮（Rika）於ViuTV節目《G-1格鬥會》遭黎美言（Winkie）打到變豬頭的比賽於昨晚播出，Winkie騎在Rika身上用盡氣力下下「窩面」，相當狠勁，難怪Rika事後滿面瘀傷！昨日記者致電Rika，正在美國散心的她直言參加賽事後，發生很多不平事，令她心灰意冷，幾經思量後，終寫下千字文宣布退出娛樂圈！
讀Law搞生意
Rika透露節目播出後，曾獲圈中前輩邀請合作，更特別感謝鄭丹瑞邀請她合作拍戲，但近月的經歷已令她心生退意。法律系出身的Rika有意繼續進修專業，亦計劃與朋友搞生意。
對決Winkie一戰，Rika以一分之差不敵比她重12磅的對手敗陣，比賽尾聲時，Rika曾有機會制服對手，但拳證疑因判斷問題將兩人分開，未能作出致勝一擊。對於賽後掀起重重風波，Rika坦言受傷並非主因，而是遭Winkie如唐三藏般不斷以「音波功」挑釁：「受傷後我冇怪對方，我們擁抱亦係基於尊重和體育精神，但爆發點係賽後喺化妝間，Winkie走過嚟表情同語氣帶有挑釁性，講咗三次：『Rika，對唔住啊！其實我唔想打你o架！我已經留咗手o架喇！』」而Rika因一句「唔可以打面」遭有心人批評追擊，她說：「我知自己冇做好保護，但五個月到依家仍有飛蚊症、左手中指彎曲、條腰經常痛。如果有人話我放大傷勢博同情，我諗憐憫之心人皆有之，畀着第二個整傷，我都會心痛。」
好友戥唔抵
好友Hazel與Van仔得悉Rika決心退出娛樂圈後大感可惜。對於Rika遭Winkie挑釁，目擊經過的Hazel大感不值，Van仔則說：「網友一直以為我哋因為傷人而杯葛佢（Winkie），事實係佢唔識尊重對手！每個選手都盡力去打，明白會有損傷，但點解要咁對人？」而Winkie至截稿前未有回應。
| 
