標題: 「馬季即將完結，你的愛駒是…」 [打印本頁]

---

作者: EternitY    時間: 5/5/2012 12:45 AM     標題: 「馬季即將完結，你的愛駒是…」

今個馬季已經完成左一大半...

你既愛駒係邊匹?

又有咩原因令你鍾意?

令你嬴大錢? 令你印象難忘?

有個性的大逃馬, 還是如飛殺上的後追馬?

請分享一下自己的感想 ...

(註：可以多於一匹)
----------------------------

---

作者: EternitY    時間: 5/5/2012 01:04 AM

我自己分享下先



善寶

業楚航好少質新馬可以扶搖直上, 呢隻馬4戰2勝都算係交左功課,

而且仲係灰色馬仔, 今個星期日又跑, 睇下可以點樣 ...



包裝博士

大摩打比可以出N隻馬, 偏偏輪唔到佢, 結果在4月兩連捷,

栗毛得黎極有貴氣, 留意到佢愈來愈大隻, 適應水土



太陽海岸

季初跑得一無是處, 好大隻既馬, 轉跑泥地後次次後上如飛

無論幾惡劣既環境都會衝一段



山頂

暫時三戰全勝的蔡約翰PPG，一次又一次創造奇蹟 ...

初出時睇到體重 ... 細細粒 ... 血緣又偏長 ... 諗住嬴到就不得了 ... 結果 ... 真係嬴

之後三班賽大戰芙蓉之寶 ... 綽力之城 ... 不可能情況之下反先 ...

可能就係因為咁細粒先做得到 ... 鬥心得人驚 ...
----------------------------------------------------------------------------------
愛的反面是恨 ...



快人快語

今季由告仔轉去高伯新,

直覺高伯新練得佢唔錯, 好好狀態,

不過次次賽前都係咁岳頭, 表現平平 ...

結果轉左德國佬度 ... 除左配備 ... 極速兩連捷 ...  仲要兩次都有10倍以上分頭 ... 俾佢玩死

---

作者: David    時間: 5/5/2012 01:19 AM

講到近而兩季，我既愛駒一定係雄心威龍！

今季季初國慶杯1400米可以用"電單車"既自動波方式贏馬, 末段更以最快蹄速衝刺贏馬, 非常誇張！

到國際賽預賽，入場打氣..雄心好似有點攰, 眼見馬頸有點鬆弛...結果, 末段緊以短馬頭敗走！

賽後有點失落，怪責騎師亦不能改變賽果...只能可惜

到國際賽正賽，換番韋達上陣, 曾經贏過女皇杯同國慶杯既拍擋, 希望可以守好位...

但雄心出閘都係頗快, 沿途只好2-3疊, 但直路初段因步速過慢, 雄心已經用慣想既自動波上黎

韋達只好力拒外敵..但可惜不敵內外夾擊既港隊份子, 在場影相的我, 只好看著別人為港隊歡呼！一面無奈...

只好悶悶不樂咁離開馬場...

董事杯, 香港金杯都有入場為雄心威龍打氣影相支持, 結果, 佢不負我所望, 贏馬歸來！更兩次擊敗加州萬里贏馬

最後, 上仗去杜拜, 結果敗走..好失望, 但賽後得知因為發燒而跑得差, 不能怪太多！



前篇講完，馬季完結！用一張相齊集晒一季既好馬及愛駒既感受...

1) 時尚風采 - 老得可愛！

●　八歲老馬仍可以同一眾新星鬥爭，而且取得成就並在今季本地賽事未甩獎金！

2) 曬冷王 - 唯一勝仗！

●　經歷過四歲大賽之後，曬冷王明顯回落，季初用盡餘下之力氣贏得一仗本地三級賽！希望能在下季有成績交出！

3) 卡達聖 - 一仗功成！

●　係一哩預賽中險勝馬王 雄心威龍，簡直係一戰成名！但其後未知是否用力過度，未能跑回應有水準，比較失望！

4) 雄心威龍 - 香港馬王！

●　一季部署完全失敗的策略，遠征杜拜只令馬王痛失三冠，在遮打杯取得亞軍，未能與翠河並列三冠成就！只令人覺得一個馬王獎是可憐，無說服力！比較失望..希望下年可以捲土重來！

5) 陽明飛飛 - 首奪打吡！

●　陽明飛飛為練馬師蔡約翰帶來首個打吡冠軍名銜，但應屆打吡亦被視為近年來最弱的打吡冠軍！成為愛駒之一係因為白鼻樑吸引 :)

6) 統治地位 - 天時地利人和！

●　女皇杯當日早上為紅色暴雨，但大家以為賽事需要改期時，天公做美，令賽事可以順利舉行！賽事前好多朋友已經講明：黃金巨匠跑天春都唔睇，走黎睇隻GII馬要贏女皇杯！結果，真係見識到日本仔部署非常準確，當中..亦有人話韋達讓位先可以贏得輕鬆，睇怕水準未必如你所講一樣！

7) 智多飛 - 最佳長途馬！

●　三歲時候練馬師認為係中距離以上馬匹，明顯講得無錯，係今季谷草2200米中段發力勝出，遮打杯更以勁勢力拒馬王奪冠！希望下季能為港隊在香港瓶奪標！

8) 軍事攻略 - 忠心善戰！

●　軍事攻略就如當年好望角一樣，非常忠心，但可惜贏馬次數並不多！值得安慰係可以衛冕冠軍一哩賽..個人希望佢好似好望角，長期遠征吧

9) 花月春風 - 轉戰香江！

●　大家都知花月春風未黎香港之前係愛爾蘭同過SO YOU THINK及瑰寶灘鬥，只怪水平不夠轉戰香江 但成績算是不過不失，總算係煞科日贏沙田一哩錦標！

以上有某幾匹未必係最愛，但贏馬係值得恭喜及表揚一年既馬季結束

[ 本帖最後由 David 於 19/7/2012 01:30 AM 編輯 ]

---

作者: 天使小帕    時間: 5/5/2012 01:39 AM

我個簽名頭像已經說明一切

---

作者: May_Be_83    時間: 5/5/2012 02:27 AM

我同樓上幾位巴打唱下對台先，
今季愛駒正正就係「加州萬里」，
呢隻灰馬自從上季遠征新加坡大敗之後，
初出沙田錦標，仲諗住佢都係熱下身，
點知佢沿欄直上，最後仲贏埋，
睇到我心到震埋……



其次到馬會盃，由於先後被「魔法幻影」同「自由好」招呼，結果只能取得一席第四，
有點失望，但仍有盼望，都希望佢下場香港盃贏啦掛？
結果……佢終於做到了，哈哈哈。







贏完香港盃後，係董事盃同香港金盃輸俾雄心威龍，



到杜拜遠征，更大敗而回。回港跑女皇盃，對佢爭勝不存厚望，
返港後狀態成疑，試大閘要推，跌磅，種種不利因素之下仍跑入一席第五，令我有點意外。



有報導話呢隻灰馬如狀態理想，將會又再遠征新加坡跑新航國際盃，
姑勿論報導屬實，我覺得唔遠征對佢更好，呢隻馬無論遠征新加坡或杜拜時，
臨場急躁，表現大失水準，如今季要再跑，都係同雄心威龍係遮打盃再鬥過啦。

雖然今季屢輸俾馬王，但佢贏左一場含金量極高既香港盃，
馬仔細細，鬥心驚人，已經值得成為本人本季心目中愛駒。

(以上相片為自家影……)

[ 本帖最後由 May_Be_83 於 5/5/2012 11:50 AM 編輯 ]

---

作者: 細B    時間: 5/5/2012 09:57 AM

今季賽事可謂十分精彩...亦都有好多新星湧現....有不敗之師....亦有好似「精彩日子」呢類質新馬跳級跑一級賽跑得好....4歲精英份子「甜橙」係國際一級賽跑入位置....呢d都係今日相當好既馬....
而我從眾多好馬之中....選出一匹成為我的愛駒....或許牠不是一匹頂班馬....或許將來成就頗高....也或許進度不足而停濟不前....但我相信仍會十分喜歡此馬.....

「愛歡笑」黎香港之後....由佢試閘一刻開始....我就被牠十分靚仔的白鼻樑深深吸引....走規不算純熟....但那種姿態十分惹人喜歡.....

初出一仗因為柏寶停賽而換上由杜利萊...當時心想...這是一匹有後勁的後上馬....由杜利萊策騎應無問題....不以出閘一刻....馬匹向上跳躍....因而失地甚多....當時此馬沿途大包尾於外栖慢慢湧上...雖然與頭幾位馬匹相差甚遠....但初出蝕位大外檔追上....那種姿態更令我顯得分外驚喜....

翌仗賽事終於配返柏寶策騎....當時此駒走規十分幼嫩...入直路後加速力與上次不一樣....心想以為今次還是會落敗吧....但最後200米...三兩步就已經上前越過領先的馬匹直領終點....此加速力驚人更令我刮目相看....當時我就已經將此匹馬的形象定為頂班馬....

其後再跑同程千二米賽事....或許缺乏新鮮感....而且直路早段被困於內欄....不過當搵到位望空時又即刻撲上....大隻馬能夠係馬群中穿上....可見此馬膽量不少....翌仗增程千四米....更需要負上頂磅作戰兼排在外檔起步....而且面對季內曾三勝的馬匹「卡加大師」....不要說贏馬....就連跑入三甲都成問題....起步順利後沿途都走2,3疊留守尾疊位置....入直路彎時已抄出大外檔準備加速衝刺....入正直路後鏡頭已不見「愛歡笑」的蹤影...前面卡加大師跟好位之下已透出.....就在此時不斷聽到旁述不斷地叫「愛歡笑」的名字....就係呢一刻....「愛歡笑」從大外檔一股作氣直追「卡加大師」....衝刺十分驚人....可惜埋門一步....僅輸一個馬匹落敗....

此馬展現出無比鬥心....驚人加速力....還有就是....以牠的作賽經驗....竟然能發揮到這個地步....想必是高班馬....就睇下「愛歡笑」到底牠的最強實力....會是怎麼樣??


其實見到「愛歡笑」無論外貌或者跑法....都同我曾經睇過一套漫畫既馬十分相似....
而因為咁我被「愛歡笑」深深吸引....
或者如果是最強馬選舉...我都會像david一樣選擇「雄心威龍」又或者與 May_Be_83 一樣選擇一匹香港一級賽代表馬「加州萬里」....
但要說到最能夠吸引人的....不一定是一匹一級賽冠軍....或許....一匹有鬥心的四班馬....已經是各位心目中最愛的一匹....唔知大家又會唔會咁諗呢=]

photos by ricky





[ 本帖最後由 細B 於 5/5/2012 09:59 AM 編輯 ]

---

作者: 金碧明珠    時間: 5/5/2012 10:32 AM

今季既愛駒，但係反而有D失望既馬---自由港



忠心準繩(今季2冠1亞3季0落弟)，只係落敗於打比冠軍陽明飛飛

可惜在港退役了，唔知遲D有無機會返黎香港跑國際賽呢

而今季幫我贏錢既愛駒，當然要數到以下呢兩隻

邦先生

鐵馬一隻，後勁力強，第266場次連走兩段力拒對手來犯，超級馬印象深刻
贏錢場次：266、295

續領風騷

試準先行跑法後兩次埋尾僅勝少少，賠率又好分，被人忽略既好馬
贏錢場次：276、414

---

作者: 美好前程    時間: 5/5/2012 11:02 AM

今季我的愛駒是 自由好 老而彌堅 ，方子今季將一只7歲老馬從新帶入另一個巔峰，實屬難能可貴，目前至今自由好季內7戰全在前5名歸來，國際瓶也僅以不足1馬身距離負于墨爾本杯盟主多利得，盡顯長途實力，同埋E只馬同柏寶系最佳拍檔，要柏寶慢慢逼出黎。目前，季尾冠軍遮打杯2400米，我會睇好自由好奪標，就算加州萬里、雄心威龍、甜橙、續領風騷、多名利等惡馬加入戰團，我都會覺得自由好跑2400，目前在港難尋敵手。

[ 本帖最後由 美好前程 於 5/5/2012 11:03 AM 編輯 ]

---

作者: kaosen    時間: 5/5/2012 09:59 PM

今季我的愛駒可能同各位唔同,大家講既都係高班份子,我今次想講既係吳定強既百利旺 !
        有好多人可能唔記得佢本身係出自谷馬既老苗手上, 當年仲有份跑打比      之後轉到去強哥手上,強哥好錫佢,每年都差唔多有頭馬交代,就算無頭馬,大家只要細心睇佢既表現就知佢每場絕對都係去馬,簡直老得可愛

      雖然今年已經第六季鳥,但佢依照都仲可以交到頭馬

---

作者: 阿源    時間: 6/5/2012 09:20 AM

我偏愛操得跑得的打仔馬,而且對於一出閘就叫糊的前領馬更是情有獨鐘
我的愛駒健康藍莓正符合以上條件.健康藍莓上季所見跑姿肉酸,直路上經常"鐘下鐘下"咁,卻可以憑快放戰略贏得2W, 乃少有"中用不中看"的馬匹.
健康藍莓至今巳出賽50次,當大家都以為該駒巳用盡之際,最近兩場泥地賽卻有進步感,此駒一向以放頭為主,但第319場竟然以後上甚勁,巳知隻狀態巳起,果然下一場即以前領戰略輕鬆取勝,隔場竟然攺採後上跑法力追財運.今季隻馬跑法變得更靈活,放又得,追又得,而且因為其貌不揚,出賽多數有分頭,此馬乃大器晚成之輩,相信日後還能交出好成績



[ 本帖最後由 阿源 於 6/5/2012 04:29 PM 編輯 ]

---

作者: 小野伸二    時間: 6/5/2012 12:52 PM

[iframe]http://www.hkjc.com/chinese/racing/horse_img.asp?filename=L216_l.jpg[/iframe]


今季我既愛駒係讚惑，由佢兩歲出道起已經留意住

因為佢型格好靚，而且又係雄馬，有配種價值。

3歲個年上到100分已經好多人認為佢係經典一哩既爭標者

可惜今季起初進度起得有點慢，可能係搏多左

但其實佢季初已經133磅高難度贏場泥地

之後係級際賽都輸唔遠

終於俾佢係上場G2力壓精彩日子，贏得第一次級際賽

個刻真係好興奮

雖然佢未必係一級賽駒，但我就好鍾意佢啦

---

作者: EternitY    時間: 1/7/2012 10:43 PM

此活動繼續 ... 歡迎分享 ... !!!

---

作者: industrialist    時間: 1/7/2012 11:27 PM

小弟今個馬季,什至早幾個馬季的愛駒都只有一匹,就係現役中跑得最多的天鷹.

呢隻馬可以說是吳定強既收租馬,一年起碼都有一win,呢樣野我相信大部分既馬都做唔到,
可見吳定強保養功夫一流,而且每次贏馬,都好似話"仲有好多架,我仲好有能力架"
即使係完全不合發揮之場地上,佢都奮力地跑,什小大敗
個種感覺好深刻,始外,此馬溫馴易騎,咩種類騎師都可發揮(由佢所贏既賽事均由不同騎師策騎可見)

當然,佢始終都敵不過歲月既痕跡,今年終於都有明顯退化了既現象,感到力不從心了
係2012年7月4日,佢將會進行佢係香港最後一場賽事(第99場),希望佢可以仲話到畀人聽佢有能力取得頭馬

小弟當然唔會期望會有d咩儀式,只希望退休後生活愉快就夠了

---

作者: Jacobee    時間: 2/7/2012 01:32 PM

今個馬季、我的愛駒係步步穩、佢一路受到傷患困擾、08/09馬季甚至只出賽2場、都知傷得幾嚴重。

09/10馬季 、季初表現唔突出、但我估佢唔到、首先勝出冠軍一哩賽、更連捷3場、令我好驚訝。

到左10/11馬季、頭三戰都可以係頭2名返黎、仲贏左場一哩錦標預賽、所以覺得佢有能力贏香港一哩錦標。但係臨場退出。復出後都冇咩表現、令我覺得此駒係時候退役。
11/12馬季、在一哩錦標預賽跑第8、令我在一哩錦標中睇淡、但係佢居然可以係E場大賽頂著都巿風光及曾受困的軍事攻略、令我目瞪口呆。最後、步步穩出戰佢既最後一場賽事－冠軍一哩賽、最後佢跑得第5名、本來再想出戰精英盃、但係佢又受傷、就退役了。
小弟文筆唔好、請多多見諒。

---

作者: Kurofune    時間: 2/7/2012 07:13 PM

小弟今個馬季ge愛駒係財寶鷹 呢隻4歲愛爾蘭馬仔 基本上 每一場都會追一段好強ge後勁番黎 同埋除左頭2場熱身之外 每一場都從未甩獎金 呢隻馬令我最深刻個場就係25/3個場2000米
係個場郭立基走位好差  搵左幾次位先搵到位衝 雖然已經比高友勁走甩左 依然好努力咁追番個第2
同埋隻馬真係好犀利 初跑谷草都贏到  贏到谷草性能好好ge駕翠 但跑完個場之後傷左  希望佢快d好返 相信佢仲有好多進步空間

---

作者: am20462046    時間: 3/7/2012 11:21 PM

1.天久
這隻第1次跑隻時,我已tip中它有Place(9倍),所以令我十分難望,跑後第1場後,我覺得它是1班馬
我一直跟隨天久的表現,它沒有令我失望。
不過,天久的強項是1400,可惜的是香港太小1400的goup比它跑
講返正題,今季天久多次失運。人馬錦標輸馬頭,寶馬冠軍一哩賽跑到一流敗在軍事攻略。今季天久跑在9場,2場G1winner,2場亞,2場季。若天久可以今季在人馬或冠軍一哩賽任何一場勝出,肯定大大增加做馬主的說服力。現家,馬王的寶座大機會雙手交給小橋流水,我死都唔眼閉。

2.高耀之寶
高耀之寶第1次跑入Q,我中到正一正,之後它表現合格。這隻馬生成泠門命,下季時刻要注意。
3.赤膽
新馬贏完增程難道超高,赤膽可以在4場新馬賽見到不斷的進步,下季會大放光芒。

[ 本帖最後由 am20462046 於 3/7/2012 11:36 PM 編輯 ]

---

作者: CJ.    時間: 8/7/2012 12:36 PM

今季我的愛駒有兩匹,分別是步步穩和讚惑

首先談步步穩,還記得當年步步穩只得4歲,出爭冠軍一哩賽結果爆大冷一放到底,由那時開始,牠便成為我的愛駒,而且認為此馬實在是前途無可限量,但可惜一直受傷患困擾,直至7歲時那季的季尾,牠終於跑出本身水準,嬴了主席錦標後,連下兩城,相隔3年再次嬴出冠軍一哩,創下一個紀錄,當時我的心情相當興奮,終能看見牠跑回最佳水準,再奪國際一級賽,之後再憑級數以超班姿態壓過雅雪嬴3級賽,並奪得當季最佳一哩馬殊榮,實在是難能可貴,到了8歲時,戰鬥力仍沒有絲毫減退,受讓自由好5磅下仍以輕鬆姿態嬴出馬會一哩錦標,之後進軍香港一哩錦標,當時被眾人看好,成為頂頭大熱門,但最終臨場退出,當時我十分失望,認為錯過此機會,到9歲時根本沒有可能嬴此錦標,幾個月後復出首兩仗毫無睇頭,但之後兩場3級賽又開始有走勢,到了今季首仗出爭2級賽,負頂磅回來亦只負個半馬位跑第4,表現眼前一亮,而且我亦重拾信心,認為牠還有嬴香港一哩錦標的希望,儘管在預賽時表現平平,我亦沒有失望,並認為9歲馬用一仗回氣留力跑正賽乃合理之事,因此沒有減少我對牠嬴香港一哩錦標的信心,直至臨場,眼見獨嬴賠率有66倍,我便叫我老豆買$100獨嬴以示支持,結果真的嬴了回來,當時在直路最後200米,眼見軍事攻略和都市風光如飛殺上,在電影機前叫著'頂住,頂住',最終心情由極為緊張變成興奮得難以用言語形容,此刻,我已忘記了自己買了$100獨嬴,緊張和開心的心情並非因為嬴錢,而是為步步穩嬴出此項錦標而感到無限的興奮和感動,一匹9歲香港代表馬嬴出此項國際一級賽可說是奇蹟,牠又再次創下紀錄,而我亦為此而獲得無比的滿足感,到牠競賽身涯最後一仗(冠軍一哩賽),跑來亦能展現出其9歲馬的鬥心
最後,要再次向此匹老王忠SALUTE,祝牠退役生活逍遙自在,安享晚年

至於讚惑,此馬由初出時已經特別留意牠,形格靚之餘而且是雄馬,在牠出道首季表現中規中矩,但到新一季便有很大進步,初爭4班1200展現出強勁變速力,最後100一找到位幾步就過曬,之後升班增程連嬴兩場,印象最深刻的一場是嬴川河勁駒那場,給人一種馬王風範的感覺,可惜之後的表現未如預期,今季最高成就亦只係嬴1場2級賽,雖然如此,我還是很喜歡牠,希望牠下季可更進一步,如成績未有突破,那就希望牠提早攞去配種吧

[ 本帖最後由 CJ. 於 8/7/2012 06:55 PM 編輯 ]

---

作者: 小武士    時間: 8/7/2012 01:21 PM

講到愛駒...對於我黎講一定別無他選

甜橙


呢匹馬我由上季睇到宜家 由佢第一場開始我已經覺得匹馬非同凡響

如果有有心人留意既話 (我諗無XD) 逢親有甜橙出賽果場

賽後我都會響RW鬧下D跑法/鞍上人騎法

今季安國倫騎幾多場我就鬧足幾多場

其他RW巴打都有俾評語 例如匹馬狀態好難push喇 / 應該趕唔切跑打比 / 甚至係匹馬進步係得咁多

但我一直都唔信 因為覺得匹馬真係唔岩跑法 同埋睇得出安國倫純9跑 所以無放棄支持呢匹馬

結果俾巴米高騎果一場賽事 證實左我無諗錯 因為後勁真係幾好

之後係點就唔洗多講啦雖然多場級際賽跑place 但我覺得呢D係條命唔好 唔係跑得差

真係好彩D 今季做左三冠馬王

我對匹馬未來前景充滿希望 (雖然伊神成日搞屎棍)

----------------------------------------------------------------------------------------------------------------

仲有另一匹

牛精大師


呢匹馬我係覺得短途可以好屈 但又係衰響條命

我一開始鍾意佢 純因為佢個名 精英大師+牛精福星

初出1200三疊輸唔遠 之後反勝金鎸龍華 皇帝法令

跑1400 差D偷精彩日子雞 反勝新希望 連追都無得追 本來前途一片光明

馬主係都要佢跑打比 之後又俾吳嘉晉響谷1650亂舞 傷上加傷

宜家仲要無啦啦做埋公公

對佢個感情就好似愛人俾人打咁 鄧佢可憐

---

作者: EternitY    時間: 15/7/2012 10:33 PM

活動繼續至八月十五日

---

作者: 阿源    時間: 21/7/2012 06:00 PM

趁今日得閒，再介紹一匹自己心中的愛駒
灰馬仔由於毛色較特別，所以也更惹人喜愛，而且灰馬中亦出過不少好馬，如早年的禄怡，及時而出，到還在服役的加洲萬里，都係鬥心頑強的馬王級份子，而今天要介紹的先鞭直前，我覺得下季大有機會在級際賽揚威
先鞭直前上季以兩歲之齡插班贏馬,巳知非凡品.豈料其後健康受挫,久休八個月後今季初出以後上姿態爆出28倍冷門.其實先鞭直前是以放頭前領較好的馬匹,該仗咁贏法完全係食班的表現.
上二班後,除第一仗熱倒之外,場場表現穩定,其中488場用最擅長的快放戰略,大炒花月佳期,幸運雄威,夢幻十一,鐵胆龍一批準一班馬三個馬位,此仗巳證明了此駒具級際賽實力
其後G3沙田銀瓶直路上眼看巳力弱,卻能在最後幾步FIGHT BACK,與另一匹鬥心極頑強的佳駟甜將鬥到叮噹馬頭過終點,演出令人激賞,當日若非騎者早段放太快,相信戰果早巳攺寫.
季尾谷草一戰,由於抽到好檔,當晚巳對此駒充滿信心,結果馬兒力拒一眾谷草專家的來犯,不負所託,順利贏馬,也幫我發左一筆小財

展望來季,贏G3係我最基本的期待,希望隻馬能更進一步,進軍G1




[ 本帖最後由 阿源 於 22/7/2012 12:28 PM 編輯 ]

---

作者: 週日寧靜    時間: 23/7/2012 08:36 PM

愛駒1 :
卡加大師
呢隻卡加大師今季真係硬凈到你唔信

本身我自己對「卡加」系嘅馬唔太留意，雖則係曾志偉嘅馬，一來自己對佢名下嘅馬冇好感，二來d馬多數都唔係大超班馬

不過季初轉去高伯新，好自然會留意多咗
係我眼中 (能力:  高伯新>> -6航  >  杏仁李)

轉倉前44分，而家講緊72分，仲高過初初黎香港個評分;
況且7歲一季執 4 Win，最差都係場次150，第9，其他全部有獎金
一季4Win (除左神仙d 優質PPG/ 大摩d馬  會相對容易之外)


要數最深刻賽事係場次281同701果兩場...
281果場睇到眼都突埋，14檔，沿途留係尾，最後整段22.86爆贏
最神奇係，你可能以為鞍上人係杜利萊，點知係卓利
我諗你同我反應可能一樣，都會吓咗一聲
卓利竟然後上贏馬
(佢嘅功力，大家心照啦 )

到701果場，好睇在 隻馬竟然咁好heart
以為好心思食硬啦，點知兩個澳洲佬鬥到9彩
WOW，結果fight back贏馬


7歲馬竟然成季變咗銀行馬

展望 : 10-15分上升空間，2班輕磅可能會執到一 / 兩場
-----------------------------------------------------------------------------------------------------------------------------------
愛駒2:
山頂

另外一隻點少得神仙PPG  

撇除所有因素，鍾意隻馬係因為個名

3歲已經3Win，要挑剔嘅當然係身型
可能因為咁，所以跑得算少
(對比下盈彩繽紛算少)


焦點係504場，成條直路俾人封咗四分三，最後一百米一有位即刻過哂 芙蓉之寶 同 綽力之城，屈到呢

睇見達少冇位出就好好笑，最終叫有驚冇險咁贏

展望 : 新 一季 3 - 4Win， 過一百分

---

作者: mnekjg9mXD    時間: 1/3/2016 05:11 AM     標題: del



[ 本帖最後由 阿源 於 19/4/2016 11:12 PM 編輯 ]

---

歡迎光臨 賽馬世界 (http://racingworld.no-ip.org/)

Powered by Discuz! 5.0.0