標題:
馬國明唐詩詠拍拖斷正
[打印本頁]
作者:
帶來吉利
時間:
23/1/2015 08:40 PM
標題:
馬國明唐詩詠拍拖斷正
40歲的無綫小生「天然呆」馬國明，乖仔形象入晒屋，接陳豪棒成圈中筍盤。馬明自與胡定欣兩年半情玩完後，雖與多名女藝人傳出緋聞，不過一直得個傳字。傳得最耐又保持親密聯繫的僅有契妹唐詩詠（Natalie）。近年兩個single and available的契兄妹dry dry哋愈玩愈埋，再度暗撻幾個月。日前，蜜運中的「詠明戀」連體睇車，馬明睇中部74萬跑車，就搵埋女友去睇車，之後再二人世界撐枱腳。甜蜜飯局後，詩詠仲做埋柴可夫司機，絕世好女，係邊度搵呀！
現年33歲的唐詩詠，自05年與賤男崔建邦拍拖後，多次離合，兩年前雖傳出與馬明有過短暫「兄妹戀」，不過隨住賤邦死𦧲，詩詠仍對偷食邦一條心。直至去年中崔建邦搭上18歲的廣州o靚模陳嘉莉（Kelly），唐詩詠正式死心，情傾洪永城。不過戀情開始無耐，有傳唐詩詠同契哥馬明因合拍《梟雄》日對夜對，感情又再翻撻，連女主角回應緋聞時都話：「畀啲時間我，我拍完劇得閒會再留意吓。」
據了解，10年曾合拍劇集《鐵馬尋橋》的馬明和Natalie早已互生好感，奈何當時各自有另一半，做住契兄妹先。11年，二人再合拍劇集《真相》感情更佳，乖仔馬明就與胡定欣正式斬纜後先與詩詠開始，惜Natalie仍深愛崔建邦，同馬明的地下情只維繫一段短日子。直至去年N度合作，「詠明戀」終於翻撻。
睇七十四萬跑車
上周六（17日）晚上，拍完新劇《當鐵馬遇上戰車》的唐詩詠約新仔見面，當日她先與馬明二人行去銅鑼灣Benz showroom睇車，只見男方早已鎖定目標，對平治新車A45 AMG和CLS 63 AMG好有興趣，不過價錢差好遠，A45車價約74萬，CLS就要成177萬，對揸開40萬掃把佬的馬明來說，買部A45實際好多，馬明拉女友試坐黑色車後，就同車行職員密斟，臨走前話：「後日見啦！唔該晒！」似係已扑鎚買跑車。
載仔離開
睇啱新車後，馬明全程笑笑口，然後同女友揸車去世貿中心撐枱腳。蜜運情侶一餐飯都食足三個半鐘，食到十一時last order先肯埋單離開。二人取車時，馬明耳仔通紅，似有醉意，詩詠出晒名係絕世好女友，她先為馬明開車門，幫手執拾車廂，馬明就全程雙手插袋等女服侍。執好車廂，詩詠再楔入罅捐入司機位，然後做柴可夫司機載仔離開，繼續二人世界。
馬明愛姐仔
馬明入行逾10年，戀事唔多。05年傳佢同年長9年的曾華倩譜出一年「姊弟戀」，之後仲有胡定欣和26歲寰宇小花徐佳琦等。
歡迎光臨 賽馬世界 (http://racingworld.no-ip.org/)
Powered by Discuz! 5.0.0
