標題:
喬寶寶激讚陳欣妍靚女冇架子
[打印本頁]
作者:
帶來吉利
時間:
1/10/2020 05:24 PM
標題:
喬寶寶激讚陳欣妍靚女冇架子
定居蘇格蘭嘅喬寶寶返咗香港個幾月，拍完電影《時代》及中印獨立電影《我男友係好差》，賺咗一袋金後，日前平安返抵屋企「慰妻」喇！今次寶寶返港最開心有機會同「女神」陳欣妍合作拍電影，「佢靚女又好笑容，仲冇架子，好Pro，喺佢身上搵唔到負面嘢，導演真係好有眼光！」被激讚嘅陳欣妍(Shirley)面紅紅，話要同寶寶上契做父女喎！
《我男友係好差》係一部籌備咗兩年嘅獨立電影，講述一個中國籍少女同印度男孩喺香港發生嘅愛情故事，並帶出香港及印度獨有文化。喬寶寶最難忘係配合南印度家庭習俗，有場戲要用手去食咖喱飯，令他唔多習慣，反而Shirley演得好自然。Shirley即說：「其實我唔Pro，只係平日習慣用手拎嘢嚟食，咁拍前先消毒雙手嘅。」
陳欣妍最難忘獻出銀幕初吻：「嗰場戲講要同成家宏（Karan Cholia）Goodbye Kiss，我喊到流晒眼淚同鼻涕，咁嘅樣都嚟錫我，佢更加專業啦！」Shirley冇畀男方嘅鬍鬚拮親，反而覺得有鬚嘅男人好Man，拍前亦唔使同男友沈震軒備案，因為工作係專業嘅。而成家宏就讚Shirley幾好錫，在旁嘅喬寶寶帶點葡萄說：「佢有好多宅男Fans㗎，你因住被打呀！咁靚女，就算流晒鼻涕，十個男人有十個都肯啦！我拍戲以嚟，只係喺《張保仔》錫過黃智雯隻腳咋！」至於導演Sri Kishore就大讚Shirley似鄰家女孩，最啱演呢個角色。
歡迎光臨 賽馬世界 (http://racingworld.no-ip.org/)
Powered by Discuz! 5.0.0
