連詩雅(Shiga)是呢期的負評王，跟葉蘊儀幫ViuTV拍攝《跟住矛盾去旅行》因表現作狀，被網民狠批為「極級港女」、自爆跟有米男友Anthony分手，無人同情之餘再被串4年間結識過20個男友、連15歲時單眼皮食雪糕啜手指的陳年寫真集都被巴打們恥笑「女大十八變」，Shiga坦承唔開心：「呢啲咁有話題性嘅說話當然唔會好聽。」自小雙親離異，母女兩人相依為命，一向獨立的Shiga為自己平反：「我點會係港女？啲人睇得太表面，冇留意我嘅經歷，我只係一個有喜怒哀樂嘅正常女仔。」
「紅人」連詩雅新歌《血一般紅》講述被另一半背叛，女方策劃連串報復行動後決定唔再做受害者，所以她狠心剪去10吋長髮來配合，不論歌曲風格及造型都係新嘗試，跳出舊有的柔弱及只會演繹慘情歌的框框。原來Shiga對某些事會好固執，如長髮加着裙才算是女生，如果女仔失去一把長髮，自信心都會冇埋：「入行6年，頭3年公司已游說剪頭髮去改變形象，當時真係接受唔到，直至人大咗，睇法開始唔同晒，我覺得依家係時候跳出框框，剪短髮後明顯比人獨立硬朗嘅感覺，我唔再係別人眼中嘅受保護動物，其實剪髮時有工作人員遞紙巾畀我，但我冇喊到，剪完仲有好多人讚添。」
屋租兩母女分擔
傳跟Shiga拍拖3年的麻將大王石鑑輝家族成員石恒聰(Anthony)因第三者介入而移情別戀，問到是否長髮為君剪？她例牌否認：「呢啲只係電影同電視劇嘅橋段，單純係思想上轉變。」對於失戀時演繹失戀歌《血一般紅》係咪更易投入？她又否定：「兩個case唔同，《血一般紅》係講男仔背叛，個故事都幾激，真實版失戀好平靜，人愈大愈變得冷靜，大家都係大人會坐低去傾，受情緒影響會作出唔理智決定，嬲完後會後悔自已意氣用事。」她堅持分手原因是雙方都太忙，為事業放棄筍盤，Shiga強調唔心痛，「哈！我都係筍盤啫，睇緣份啦，兩個人拍拖唔一定要睇對方有冇錢，係咪有家底，擁有啲乜。」她順道澄清，現居的九龍塘寓所由母女兩人租用，並非傳聞中Anthony未下逐客令暫畀兩人住。她強調，Anthony一直住在她寓所附近：「屋租係同媽咪一齊分擔，同任何人無關，今時今日我所擁有嘅嘢係媽咪努力工作所得。」她語帶肯定說：「17歲開始已經濟獨立唔使任何人照顧，特別見到父母分開，已明確地同自己講，要有能力養活自已，除咗媽咪無邊個都得，因為永遠唔會知道身邊人幾時會離開。話我係港女啲人睇得太表面，佢哋唔知我經歷就話我。其實不得不讚《跟住矛盾去旅行》剪接得好成功營造到效果，做到好緊湊同埋好有火花，增加好多娛樂性話題。」
食得鹹魚抵得渴
唔係「極級港女」，連詩雅眼中嘅自己係乜？她大笑說：「熱愛唱歌嘅正常女仔，畢竟係一個人，所以興奮時會變得高音，係咪港女好難有一個準則，每人心目中港女定義都唔同，所以我冇諗得咁複雜呀，最重要係做好本份，選擇呢份工作其實都知食得鹹魚抵得渴，鍾意你嘅人點都鍾意你；唔鍾意嘅亦都一樣，我又唔係傷害到人，呢啲嘢控制唔到，唯一會提醒自己唔好咁high咁高音。至於用字中英文夾雜真係冇辦法，因為冇正式學過中文，拍嘢時諗唔到個Terms只有咁樣去表達意思，而廣東話不時有捲舌R音亦唔係刻意，係我一向冇留意，好難令全世界咁pleased自己，唔通因為咁以後唔講嘢？唔發Post咩？。」
