上月尾，苟芸慧在放病假期間偷偷去珠海練賽車更唔小心發生意外，戰車凌空連環打滾幾個圈，再360度轉完反肚落地，聽見都驚，好彩苟姑娘送院檢查後並無大礙。事後TVB並未安排苟姑娘在《東張西望》官方節目中報平安，一改以往作風，對呢件事低調處理，有指TVB對「肥苟」處於半放棄狀態，新劇《EU超時任務》亦安排她做有角色名的「蛋散」，戲份極少，拍完劇仲要被放病假。對傳聞，無綫製作資源部總監樂易玲堅稱冇咁嘅事：「無綫冇人咁殘忍嘅！」
體重急升至170磅的「肥苟」因為受情緒病困擾，導致甲狀腺出現問題，長期服食西藥導致肥腫難分。據稱，公司都好體諒苟姑娘，去年仲安排她做世界盃重頭節目，安排她隨隊去巴西取景做實地採訪，寓工作於遊覽輕鬆吓，但因為廣東話講得唔好，反應又慢幾拍，唯有盡量唔驚動她，重責落在高鈞賢等主持身上，由她行行企企就算。即使近日煞科的《EU超時任務》，苟姑娘只係做閒角，由二線女主角急降至高級老臨，?家被放大假3個月，假期至11月為止。
對於放病假時冇通知公司走去珠海練車，樂易玲強調冇問題，唔會怪責：「事後佢有親自上嚟TVB經理人部門同我哋報平安，今次佢喺休息期間去學車，想返加拿大前學多啲嘢，除考香港國際賽車牌外，仲想考多個國際版，所以過去珠海學車無問題，而且佢冇受傷，又唔工傷，學車又買晒保險，故毋須報備。其實苟芸慧都病咗兩年幾，其間乜方法用盡都唔得，諗住安排佢開工睇吓會唔會好啲，可惜情況一樣，咁不如正式請假返加拿大休息，等佢心情好啲對病情有幫助，我哋冇放棄過佢，個個見佢病成咁，世界盃期間亦冇投訴佢表現差，唔通逼佢去死咩？無綫冇人咁殘忍嘅！」
