阿提比似巫斯義？
杜拜世界盃響上個禮拜圓滿結束，沉廐年幾高多芬趁主場之利重振聲威，
響阿聯酋打呲同高多芬一哩賽包辦連贏，一洗頹風。
重頭戲杜拜世界盃，美國代表「裝備齊全」由頭帶到尾，
破紀錄地拋離亞軍十四個馬位，但嗰晚獨攬兩W嘅阿提比，表現亦令人相當驚喜。
相信賽前好少人知阿提比係邊個，但原來佢咁騎得，放頭又得，後上亦難佢唔到。
天生一個大鼻子，側面睇成個「中東版有鬚巫斯義」嘅阿提比，
佢阿叔係九六、九七年度香港瓶盟主「牢騷」同「威信」嘅馬主Saeed Manana，
細細個就已經做騎師，但唔係騎馬而係騎駱駝，由七歲騎到十六歲。
有日穆罕默德酋長同佢講，阿聯酋出過好馬、好練馬師，唯獨未有好騎師，
問佢有冇興趣試吓，結果阿提比接受酋長邀請，○三年先到愛爾蘭學藝，
之後轉到澳洲上陣，響智朗馬場憑薛拿訓練嘅Al Tharb贏得人生首場頭馬。
每年冬季阿提比都返杜拜出賽，暑假先抽空到外地客串，佢一直視戴圖理做偶像，
由於響世界盃表現出色，高多芬賽後請佢做馬房副帥，
今個暑假將隨大軍飛往歐洲參與大賽，到時除披上藍色戰衣同戴圖理並肩作戰外，仲有機會同正牌嘅巫斯義同場較量哩﹗
-------------------------------------------------------
嘗試出貼 :ppp: :ppp: :ppp:
| 
