世界盃落幕，在無綫專責露肉陪睇波的World Cup Girls亦被叮走，慶幸這班正妹個個有樣有身材，屢獲中間人安排北上登台搵快錢，早前便見貌似超蓮的陳詠珊（Karena）聯同兩位好姊妹到深圳夜店搵食，只見43吋長腿Yuki好賣力，完騷即被召入貴賓房陪土豪老闆飲兩杯，至於中段被人掃背抽水兼問價的Karena，則借意避席拒絕陪酒。
世界盃期間，無綫收費台的《低俗講波團》為吸收視，推出32位World Cup Girls陪睇波，肯博又肯露的囡囡們成功殺出血路，世盃過後頻頻北上登台吸水，雖然僅得幾千蚊人仔一場，但密食當三番。
跳鄭多燕娛賓
早前記者見個樣幾甜、有幾分似何超蓮的Karena，跟大隊到深圳為夜店Fever作開幕嘉賓，同場有世波女Jody、Yuki和工展小姐蘇慧恩等，土豪老闆大手筆請九條港女充撐場面，開香檳祝酒時，更講明要班囡囡一杯清，識做的Karena一飲而盡。
這場表演騷其實都幾豐富，除一般勁歌熱舞派簽名肉照外，還有魔術表演、棟篤笑和健身舞睇，是的，小背心谷胸上陣的世波女Yuki即場跳鄭多燕，趴地趷籮高潮眼，引發台下班阿叔激動叫囂。
負責棟篤笑的Karena表現淡定，跟台下阿叔互動調情，誰知幾句閒話便挑起對方條筋，中段被阿叔追住狂影兼問價，嚇到差點爆喊的她迅即走避，連老闆Call入房敬酒都唔願蒲頭。
