舞台劇出身的港男白健恩（小白），今年三月捲入「基鴨」事件後，曾多次跑出來呼冤「被人屈」，但觀眾仍抱半信半疑態度等睇好戲，甚至有網民開post研究大隻仔拍劇姦高Ling都唔過電。流言蜚語下，小白選擇出書剖析內心世界，還自爆五年無性生活，「我鍾意女人若隱若現咁，千祈唔好全裸企喺我面前，拍拖追女仔唔係為上牀，坦白講，我已有五年無sex！」Dry成咁，唔怪得令人誤會。
男人最忌被人話基，白健恩仲要慘到被人以「基鴨」來形容，今年三月有周刊圖文並茂指他在網上接客，又「放蛇」約到天水圍進行不道德交易。每次說起此事，其經理人必忍不住流淚，小白說：「娛樂圈好複雜，五光十色的事情令你覺得好吸引，但同時亦好畏懼，那件事都過咗咁耐，自己要學識放低，無嘢好怨，只怪自己無帶眼識人，現在開始懂得遊戲規則，學習跟人溝通和表達自己。」
同JC去街無壓力
醜聞從來只有愈描愈黑，「唔鍾意被人屈，明明不是這樣，感覺好無辜，好多人會因為那篇報道對我有偏見，以為我做嗰啲嘢（賣淫）！做舞台劇的人好踏實，有時窮時啃個麵包就一餐，慶幸我入娛樂圈後仍有做副業！」小白話口未完即被經理人兇狠眼神警告，他即急忙解說副業即係教跳舞，「哎呀，都話我唔識講嘢。」
說到剛推出的慈善電子書《當巨蟹座遇上巨蟹座》，小白笑言書中有不少大膽和敏感話題，當中包括對性的睇法，「我鍾意女人若隱若現咁，千祈唔好全裸企喺我面前，況且拍拖追女仔唔係為上牀，坦白講，我已有五年無sex！可能我享受一段關係開始前的曖昧感覺，但今時今日仲邊有人同你慢慢磋，這幾年都投入工作，未遇到個啱的。」小白唔係無選擇的，過往身邊拍檔全部有樣有身材，「你講高Ling定JC先？兩個都係我好朋友，性格爽朗，同JC出街可以完全無壓力，你係唔需要特別照顧佢，最近我發現自己鍾意成熟和叻的女人，好似鍾麗緹咁，好Sexy。」
