09年憑擔任《耳分高下》「美味天使」的「柑桔」入行的陳蕊蕊，早前突然在微博自爆跟周秀娜「花心」前度Avis（陳偉成）發展過半年地下情，而向來花弗的金剛，忽然加把口力撐蕊蕊，力追意圖極之明顯。
事後Avis以一句「假到離譜」解畫，卻換來娜姐「曱甴生蛋」寸爆，最後Avis十指緊扣拖新女友Yumi（尹蓁晞）亮相，試圖擺平「花心男」形象，最搞鬼新舊女友Yumi和蕊蕊竟是同居室友，關係七國咁亂。事件過後，金剛雖孖住蕊蕊上《獎門人》節目照顧周到，關係白熱化，但兩人仍只認是「好朋友」。日前蕊蕊接受本報專訪，終首度承認兩人相戀，還冧爆大讚男友：「佢好有安全感！」明向Avis示威！
事過情遷，陳蕊蕊談到跟Avis的一段情，仍猶有餘悸，當日兩人在朋友介紹下認識，當時對方已跟周秀娜分手，兩人撻着後雙方共識玩地下情，但半年後即告分手，蕊蕊未有否認因對方花心而分手，但何解突然在微博自爆戀情呢？
撐娜姐有見地
蕊蕊解釋：「我哋當時已無聯絡幾個月，但我喺朋友度聽到佢講我，聽完之後好唔開心，一時衝動就係微博度發洩幾句，後來知道咁大迴響，咪即刻刪咗佢囉！估唔到搞到咁大件事！（有冇後悔咁做？）都有少少㗎！」但聽到娜姐幫口話Avis「曱甴生蛋」後，本來愁眉深鎖的蕊蕊，即笑爆點頭：「佢講嘢不嬲好有見地！」
事後Avis拖Yumi力證非花心，蕊蕊當時才知同屋是前度新女友，但也不會怪女方，「真係唔關佢事，佢只係室友，我哋本身唔識亦唔熟，𠵱家喺屋企見面亦唔會尷尬。（有冇傾過有關Avis嘅話題，或者提醒吓對方？）冇，但大家有傾偈，絕對無話面左左。」
收戒指等見家長
雖然微博事件引爆連串是非，但蕊蕊卻藉此看清努力護花的金剛，還因而加分，但蕊蕊否認兩人經導演錢國偉介紹認識，「我兩年前轉做歌手，佢嗰陣負責做《勁歌》主持，成日都有機會見到，但之前朋友約埋見到多咗，發覺佢份人真係好細心，最初都覺得佢口花花，但其實係得把口啫！佢都幾宅，會成日喺屋企煮吓飯！」
蕊蕊坦言跟金剛開始了兩個月，感情穩定，給人花弗感覺的金剛，打動蕊蕊竟是「安全感」，她冧爆說：「以前啲男朋友，成日潛水搵佢唔到，佢隨時都搵到，就算做緊嘢都會覆我兩句，令人好有安全感。佢又好細心，好似見我紮頭髮啲橡筋唔見晒，佢會幫我買番！（話佢送二十萬二手Benz畀你？）我自己買咋！（你生日佢送戒指求埋婚呢？）係有送戒指，但佢唔得閒都係託朋友送，點求婚呀？（係咪過埋台灣見家長？）我哋同成排朋友去旅行，佢做導遊啫！我未見過佢屋企人。（佢媽咪成日嚟香港喎？）未有機會見到，有機會都會拜訪吓。」
