馬圈係人所共知嘅利益圈子，人與人關係亦好微妙，馬主同練馬師合作完全講個信字，彼此誠信非常重要。近排就有位外籍練馬師同馬主因買馬發生金錢糾紛，搞到非常唔愉快，馬主已經向練馬師發咗律師信，若然件事未能圓滿解決，馬主更表明隨時會入稟法庭興訟。
牽涉事件嘅外籍練馬師近季雖然成績麻麻，但以前都引入過唔少好馬，揀馬眼光有一定口碑。有位馬主睇中咗隻馬，就搵呢位外籍練馬師幫手入貨，仲真金白銀畀咗100萬英鎊練馬師。不過，最終引入心儀馬匹失敗，買馬都要講運氣，原本買唔成好平常，但練馬師就冇回返水畀馬主，馬主梗係嬲到爆。
其實呢位馬主一向好捨得揼本買馬，成個家族一直都非常支持馬會。據聞馬會CEO老應知悉件事後，亦曾經介入做和事佬，希望調解雙方糾紛。本來老應已經成功平息咗件事，但係唔知練馬師係咪覺得喺買馬過程中有使費，並唔係全數退款畀馬主，馬主覺得唔可以接受，講明正考慮正式告個練馬師。
到底練馬師同馬主間有冇溝通問題，外人唔清楚，單睇表面亦好難話邊個啱邊個錯。不過，正所謂和氣生財，希望練馬師同馬主都可以好好坐低傾吓，真係鬧上法庭就雙方都唔化算。何況馬圈又冇永遠敵人，呢一刻大家冇合作，冇人保證將來唔會走返埋一齊。
http://hk.apple.nextmedia.com/realtime/racing/20161227/56095031
