現時入行做新人，首要條件係多才多藝，少一樣都企唔住，好似樂壇新貴吳若希（Jinny），自從拍完電影《天生愛情狂》後就對拍戲拍上癮，連宣傳新歌「第一天失戀」都搞搞新意思，自編自導自演愛情短片，更跑去被淋鏹高危地嘅旺角行人專用區拍外景，當拍到分手一幕，Jinny竟跪地嚎哭，七情上面，真係嚇壞街坊。
鄭欣宜師姐吳若希都唔少嘢，唱得之外，演戲都一樣有料到。為宣傳新歌，吳若希跟網上爆紅創作人Ming仔拍短片，演繹不同星座的年輕人面對失戀後的不同反應。
由於有喪食、喪玩、喪喊等鏡頭，拍攝當天，走遍多個外景地，包括遊樂場、鬧市，拍足十六小時，一日內經歷了多次拍拖甜蜜及痛苦分手場面，不停哭哭笑笑，咪話唔辛苦。吳若希笑說：「真係好似思覺失調咁呀，最辛苦一場喺旺角街頭取景，原先導演安排去僻靜街角，但為求真實，我建議喺街頭，我仲要好激動咁跪地痛哭，當時好多途人駐足圍觀，又指指點點，點都會有尷尬，好彩幾take收貨。」之後大隊返公司拍mood shot，以為完成收工，豈料導演竟要求多拍一個喪喊鏡頭，今次吳若希投入得喊到收唔到聲，嚇親工作人員。
由4月中開始，該片隔日在facebook及YouTube官方網頁上載一小段。吳若希眼見作品面世，顯得好緊張，她強調說：「大家見我做得咁投入，以為我失戀好多次，其實我經驗唔多，對上一次經已係初戀既事。」
