樂壇孤兒仔謝安琪(Kay)跟環球唱片公司解約解足半年仍未搞掂，因為「贖金」四百萬，貴為張家經濟支柱的Kay根本拎唔出，其經理人夏森美即諗計四圍𢱑，跟當時仍未有一姐的bma傾得最投契，可惜，bma老闆羅傑承跟環球的董事總經理黃劍濤（Duncan）是多年老死，前者為免麻煩，力勸Kay搞清身份先再傾，最終讓官恩娜搶灘成功。環球其後菩薩心腸，決前事不計願再跟Kay合作，可惜夏森美還未知大禍臨頭，諸多要求，可憐Kay的財產日漸被蒸發，張繼聰隨時要孭起頭家，好大壓力喎!
據知bma跟官恩娜仍未動筆簽約，夏森美認為謝安琪仍然可坐正一姐之位，故近月仍頻頻向bma送秋波。「夏森美同bma係有接觸，但羅老闆同Duncan咁鬼friend，點會為咗一個聲名麻麻嘅女歌手而傷及多年友情？」爆料人說。簽新公司不成，跟舊公司的關係依然形同死水，有錢Show接唔到，為Keep曝光，Kay唯有狂接無錢收的慈善Show或極經濟的電台Show，收順啲好過做紙上歌星啦。
經理人死唔放手
其實謝安琪落得如此孤兒仔地步全因她的經理人，雖然環球企硬贖金四百萬，斗零都唔肯減，但體諒Kay無功都有勞，環球決定網開一面，願意跟還有三年合約的Kay繼續合作，唯一條件就是謝安琪日後的宣傳主導權要全歸環球負責，夏森美半分也不能插手，要求一啲都唔辣，但夏森美卻堅持為Kay着想，所以宣傳一定要自己做，唔想做壞Kay「愛音樂」嘅形象，雙方關係再度急凍。環球對Kay解約一事完全唔急，亦無放在眼內，因為新一姐之位已被林憶蓮取代，公司運作如常。
羅傑承拒插手
據知Kay好想跟環球和解，「佢就嚟凍死，呢期成日靠自己接埋啲奀Show，出吓鏡好過無喎，話晒係家庭經濟支柱，無嘢做手停口停，好大件事，但夏森美只顧面子，Kay真係畀佢玩死。」知情者戥Kay不值。問到會否跟官恩娜簽約後會失卻對Kay的興趣，bma董事總經理陳志昂坦言:「只要Kay搞清身份就一定有得傾，總之羅生唔想插手。」明顯地，Kay只有兩條路可行，一是交出四百萬「贖金」換取自由，一是將宣傳主導權交出，其實有咁難揀咩？
