19歲卜卜脆的「甜姐兒」陳嘉桓，去年慘遭「雙狼」抽水淫慾，幸好獲老闆兼師傅冼國林力撐，終成功走出陰霾。自言錯在「唔識防範」的陳嘉桓趁農曆年留港小休，急不及待往車公廟拜神，轉走衰氣，記者見她跪地拜神時唸唸有詞，都啱，拜神求心安，最緊要活得開心。
「雙狼」事件已成過去，陳嘉桓終於識笑，農曆年前完成內地劇工作後，急飛返港與母親Ronnie聚天倫，大年初四更有人目睹她與母親跟生父Jacky及胞弟到海洋公園玩足一日，大個女，更明白「珍惜眼前人」的道理。
跪地參拜求好運
跟父母聚天倫翌日，陳嘉桓先跟在內地拍劇結緣的黃日華拜年，之後便到沙田車公廟拜神祈福，見她在廟外揀風車時，不時跟友人細聲耳語，最後買了一大一小風車及祭品入廟，廟內善信眾多，高妹先向廟內職員查問求籤程序，然後火速攝位跪地參拜，雙手合十唸唸有詞，出廟搵人解籤時，更笑到見牙唔見眼，記者埋身聽到解籤人說：「你今年好好喎。」一句美言已能𠱁得人笑瞇瞇，靚女真係好易𠱁。
見有記者在場，陳嘉桓先愕然三秒，然後笑笑口跟記者拜年祝賀，問她有否轉個好運，「有呀，頭先有轉風車，希望今年順順利利，買了個風車畀媽咪，（有冇求姻緣？）我求事業咋，我仲細，唔敢講呢啲，支籤話我今年要往外地發展，往外地就會好，都好呀，我今年要返內地拍劇，希望發展順利。」
