請問 ... 草地和全天候賽事，那項對腳的負擔較重？

夢寐以求 竟然 報泥地賽事 ... :ddd::ddd:

草地要分快地和慢地，跑快草肯定對腳患馬唔好，這是回彈力的問題。

你自己試下將隻手打落檯面同將隻手打落張桌，睇下有咩分別。

咁泥地呢?

泥地都是屬於較軟的一種物料，會好過快地，和軟爛地應相差不遠，你可去地盤摸摸D泥睇睇。

以香港來說，泥地跑道主要是為操練用，最初是用沙地，後來轉用安妥膠，

但由於沙粒和膠粒，有時會攝在馬蹄鐵，如清潔不乾淨，好易出事，故後來改為泥地。

夢寐以求出腳咁高，轉到泥地一試也屬正常，呢種跑姿好屣力，隻左腳已經出了事，里程唔會長，應快快用盡算了。

咁即係好快玩完

最明顯嘅答案：草地係馬匹嘅「自然生態環境」（Natural Habitat），”自然”亦係最好嘅比賽表面．草同泥之間有所謂 natural cusion 嘅天然避震層（正式術語謂之 "give"），草地馬匹嘅兢賽生涯亦比較長．當然，閣下可以話跑草地同泥地/ 沙地/ 全天侯地，跑法步速要求不同，就連草地馬同泥地馬比，行起上來步姿亦會不同，但呢啲始終係後來相輔相成嘅因素．

要拗番兢賽生涯長短... 其實都唔需要點拗．歐洲主跑草，北美主跑泥；就當 2006 主賽季未完而不計在內，小弟隨手寫低再對上五屆，歐美每邊最重要三項經典錦標盟主嘅往績再稍作簡單統計，得出來嘅數據足可證明：


歐洲（英國二千堅尼，葉森咑吡，凱旋門∼三仗皆跑草）
馬匹 ／四歲或以上賽季紀錄
Motivator 策動者／己退役
North Light 北方之光／己退役
Kris Kin 金堅／己退役
High Chaparral 灌木叢／依然服役
Galileo 天文學家／己退役
Sinndar 先力達／己退役
Footstepsinthesand 足印／己退役
Haafhd 喜發得／己退役
Refuse to Bend 堅毅不屈／依然服役
Rock of Gibraltar 直布羅山／己退役
Golan 哥蘭名駒／依然服役
King's Best 帝皇首選／己退役
Hurricane Run 風馳／依然服役
Bago 緬甸皇城／依然服役
Dalakhani 帶來吉利／己退役
Marienbard 馬威霸／依然服役
Sakhee 生氣／依然服役
Montjeu 望族／依然服役
四歲或以上賽季依然服役比率：  44.4%


美國（肯塔基咑吡，必利是，貝蒙∼三仗皆跑泥）
馬匹 ／四歲或以上賽季紀錄
Giacomo 矚目／依然服役
Smarty Jones 醒目鐘斯／己退役
Funny Cide 奇先達／依然服役
War Emblem 戰爭標誌／己退役
Monarchos 滿利高／己退役
Fusaichi Pegasus 房一飛馬／己退役
Afleet Alex 飛翼艾力／己退役
Point Given 讓分／己退役
Red Bullet 紅子彈／己退役
Birdstone 雀石／己退役
Empire Maker 帝國先鋒／己退役
Sarava 星力快／己退役
Commendable 誠意推薦／己退役
四歲或以上賽季依然服役比率：  13.3%

北美三仗皆為三冠關口賽事，中間有幾匹連奪兩關或甚三冠在望，可作樣本馬匹自然較少；但好明顯，歐洲十八匹之中有八匹轉四歲仍能服役，而北美十三匹之中僅得兩匹（奇先達更甚只為隱睪馬），傷疲量之高，兢賽壽命之短可見一班．

亦難怪，君不見目下美加大部份主要練馬單位皆抱以「少」搏「大」心態，部署上儘量以最低出賽次數賺最高獎金後立即收山打種．蓋因未收山之前配種價值跟出賽相對風險日見矛盾，「怕傷」心理主導；否則近幾個禮拜各項預賽亦不會如此冷清．一匹馬 layoff，久休六，七週後一出即勝育馬者盃，五年前同練馬師講會即刻話你「上腦」，今日亦不算天荒夜譚．相反，如果喺歐洲，一啲大倉到季尾專登稍為拖慢部份三歲馬嘅進度，留番相當里程到四歲再搏，甚至有五，六歲賽季再增程 (go long)，去墨爾本跑兩哩，出雅士谷金盃，再唔係「轉行」跳欄，到今日亦週不時見到，刻下小弟一想已經記到兩匹：Yeats 同 Percussionist．

[ 本帖最後由 GallantChief 於 20/9/2006 11:29 PM 編輯 ]

GallantChief兄既分析十分詳細~~
小弟有機會要多多向你求教啦~~

歐洲的草地普遍偏軟，絕對是最適合馬匹競賽。但香港的沙網草跑道是偏快的，故對腳患馬影響甚大。

我自己就認為對馬腳的影響，在香港跑泥地約等於香港沙網草的好至軟地左右。

另有問題一問：落雨後泥地的變化如何？

多謝賜教

多謝GallantChief和肥西兄的指教。:ttt:

幾個話題都好有價值，試試逐樣講；先講香港嘅沙網草．

以前驃叔講過，香港呢種沙網草地，講去水同外觀，全世界冇邊處夠佢一流；但一定唔會有真正嘅軟地出現．老人家係有道理：因為呢種地嘅原理係地氈面冚石屎底（Carpet on Concrete），中間只特別在多左層網，水份一慘過草皮即走，長線梗保持乾快，但壞處亦有：

第一：冇根，跑道面用耐左耗損大就好易成塊「片」開．之所以各位到季尾一見快活谷塊光頭地就唔開胃；啲草根本就咁鋪上去，未生長過．

第二：馬腳固然易傷．缺少左樓上所謂嘅避震層（give），馬腳受震壓力自然增大，仲要唔知踩中邊塊草皮冇 footing 就可以連蹄帶草跣開，情形就好似政府大球場重建後初期一樣．踢波拗柴還可，人斷腳有得醫；馬斷腳分分鐘先死人後打靶．

唔知有冇朋友住喺外地，同小弟一樣，得閒有興趣喺屋企後園攪吓園藝．唔係賭錢輸馬，metaphorical 嗰隻「鋪草皮」；真正鋪草皮，小弟週不時都有做．馬場嘅草種可能不同，但講鋪法則大同小異，小弟亦見過．一塊草皮通常係一卷咁，草面卷喺裡面，草皮底嘅泥通常係極深啡色而且黏性好重，靚的話接近黑，愈深色愈有養份，本身地面亦係深色泥，逐塊以階磚式鋪，唔好打格仔鋪，十字邊好易會「披」， un-roll 一鋪落去多數先壓草皮中心，然後喺四邊慢慢向下印平，但一壓落去你自然感到淋淋地有一種彈力，好似海棉咁，鋪完之後稍洒水，過幾日當底部根基開始生穩夠養份，塊草地自然綠油油．

香港馬會處理草皮又點呢？小弟年年返嚟香港屋企，朝早落馬場跑步都見：過養和院彎，見佢地喺球場邊塊石屎台上面，逐塊草皮鋪出來淋水，認真唔開胃．第一，呢啲草皮可能來嘅時侯仲 okay，但眼見十塊著八塊底部呈啞黃色兼起晒沙，龜裂更有，根本死左大半，換轉喺呢邊亦唔會再攞出來賣，好明顯係處理上有問題．第二，小弟不止一次見過草皮已經黃晒，佢地每朝仍然繼續開大水喉照頭淋，洒到直情浸住草皮，log 晒．好多時見草黃，你唔係死洒水佢就綠得番，反而先乾至半死，唔死再浸到死… 一流．之後鋪上去點解仲可以綠油油？閣下要知道，全世界無論球場馬場亦好，今日有一種補飛科技，叫做「噴色」．

「鋪草皮」呢家野，好多時睇西片都會有。:eee:

如果照GallantChief所說，香港的沙網草地是無根，那麼日本的短草又是否同樣場地？因為當地的馬匹好多都犯下第二點，易傷。

「鋪草皮」呢家野，一年自己鋪埋唔少。:yyy:都早幾年聽過馬會講佢條跑道是獨一無二的，全世界佢獨有，故日本的跑道應不同香港的，正如GallantChief所說，草地是用來避震的，草短D自然冇咁避震，自然易傷D。

以前唔記得聽邊個講過：

香港是焗住要用沙網地的，以沙田為例，個個星期跑十場馬，如用天然草的話，好似會跑爛條跑道，種草都種唔切，原先想話跑多D安妥膠(當時未轉泥地)，但你班友又唔肯賭，焗住一定要跑草地，如是唯有用一種新跑道來跑(現在的沙網地)。

果次隻萬事旺遠征杜拜後，聽告仔講，杜拜條泥地同香港果條是不同，香港果條較實，杜拜果條較鬆，其實到現在我都仲未分得清楚實泥地同鬆泥地的分別，會唔會利某一類馬(如放頭)？


細細個開始睇驃叔做節目，的確會學到好多賽馬知識，佢會教識你點為之一隻型格好的馬，臨場沙圈點睇，點為之一隻勇馬，某一課操練的作用是什麼，那個配備有什麼用，最重要是話俾你聽點為之拉馬，最重要佢果句：「查做馬要由最高果個查起」，直頭是啟發我賭馬的思維。最衰就是那個剛仔，人家說他黑白波，他就報復，令驃叔冇得做節目，依家仲要睇果條不學無術的蜈蚣做節目。講句老實話，如果評馬人能教識普羅馬迷點睇馬，賭馬的樂趣會大好多，投注額都唔會咁低。依家果D所謂新派馬評人(驃叔話評馬人同馬評人是有分別的)，場場都話計數，其實咁樣，跑馬同跑駱駝有咩分別，跑駱駝一樣可以計數，搞到好多新一代賭馬的人唔多會睇馬，剩係識計數，自然很難投入。你試下搵一場跑蜈蚣，只要你俾十四條蜈蚣的血統出來，佢的同類一樣可以話俾你聽邊條蜈蚣會贏(其實我發現一樣野，唔知正唔正確，佢唔係睇血統，佢是睇賠率的，通常熱果隻就話好):yyy:

草身長短同草地本身質素未必有直接關係，因為草嘅長短可以靠人手剪草去調節，各處鄉村亦有各處例．譬如歐洲馬場好少會剪草，但貯水力相對強，場地本身易偏軟；相反美國當草地係寶，賽事又喜好快時速，又係天然草地，跑道底部去水力低，草身自然就唔可以大長，於是勤剪勤打理．美加有唔少騎馬人其實係歐美兩邊搵食，問佢地就最啱．佢地話，美加草地通常長到三四吋長，場地管理已經頂唔順要剪；相反去到歐洲，有時出跑道可以見到草身長到成半尺亦一樣照跑可也．

講到泥地，美加呢個全球泥地賽事主流區域，五年之內泥地賽亦好可能會成為明日黃花．因為除左「風雨無阻」之外，缺點實在數不盡，跑傷跑死太多馬...太多好馬．今季最出名，大家眼白白就睇住匹「百寶龍」差啲連命都冇，阿靈頓今年開季頭三個禮拜之內亦竟然連續有近廿匹馬喺跑道出事而要人道毀滅，平均一日報銷一隻... 障礙賽殘忍？英國佬，睇嘢啦．好多人唔明白，泥地跑道一日到尾都可以被人為耙完再鋪，鋪完再耙，再開，落雨又要封頂（seal/float），損耗量往往比草地仲大，起碼你唔會咁錫住跑；到跑道開始老化，好多時反而先喺數到三四「浸」之下嘅硬泥層（Clay Base）先行大幅龜裂，表面睇落去仲好好地，其實「地基」已經好唔平，跑道內傷亦冇人睇到．如果場地保養再「喇西」啲，隻馬踩錯腳好可能第一步冇事，第二步好似打中石屎，第三步仲好似冇事，點知係浮沙... 仲唔跛？八隻腳都死．

到某一日另一種跑道可以同樣風雨無阻，泥地賽肯定會被淘汰；而呢一日已經到左．肯塔基茵蔚園（Turfway Park）做白老鼠一 take okay 之後，愈來愈多馬場開始轉鋪新一代安妥膠（POLYTRACK）．活拜啱啱駛左過千萬加紙重鋪，十個騎練試跑，十二個拍爛手掌，部份跨張到話呢種跑道係賽馬嘅 Nike Air；跟著到堅蘭，荷里活園直頭鋪好等十二月再開，即刻吸引柏列查呢個東岸大倉第一時間「處女下海」， send 廿匹馬過去 set up 衛星馬房；加州亦已立新例，至零七年底為限，當地所有馬場都要鋪安妥膠... 呢個大趨勢始終會持續．

樓上肥西老兄提到香港以往舊一款安妥膠，沙粒和膠粒攝在馬蹄鐵，清潔不乾淨好易出事；當時技術上問題，係因為跑道質地唔可以太靈活適應氣溫濕度上轉變，香港濕度高易引起跑道質地變化，碎膠粒自然多．新一代安妥膠似乎就有把握解決呢個問題．因為承造商可以因應地方氣侯，提供不同再造物料組合及調節比重，於是由漫天風雪嘅肯塔基去到夏天過三十度嘅活拜一樣冇事；全美加認可去鋪呢類跑道嘅承造商，現時只有四間．


[mv]http://www.polytrack.com/video/polytrack2.wmv[/mv]

[ 本帖最後由 GallantChief 於 21/9/2006 11:07 PM 編輯 ]

真係聽君一席話，勝讀十年書:gggg:
我真係唔知有一款新的安妥膠