第一代八模成員A.Lin（裴殷）今年決定暫別寫真戰，始終出道近三年，不難發現對o靚模鞭撻得最不遺餘力者，就是o靚模本身，置身於無日互寸「變形金剛」、「僭建尤物」的𡃁模染缸裏，倍感惟有讀書高，今個暑假A.Lin拒絕隨「波」逐流，決定北上讀書去也。
靚模既然又名「pseudo model」，A.Lin拒絕當局者迷，她說：「我唔滿足於做o靚模，我想挑戰自己，今年會轉出手機App，又會去北京讀書，其實舊年已經想讀肢體語言，但要配合寫真集宣傳，至押後到今年，我發覺自己演技唔夠用，所以的起心肝去讀，學費要兩、三萬人民幣，生活費每月五、六千元，讀年半都唔係小數目，我以前大使慣，次次出街shopping都使一、二千，依家開始學儲錢。」
努力學獨立
對於即將展開的由富入儉新生活，A.Lin以絲毫不o靚的口脗說：「其實我由細到大都係屋企嘅公主，好少遇挫折，北上讀書連衫都要自己洗，新生活可能會唔慣，但我諗可以克服，我捱得起，至驚係冇得捱，希望去到北京可學識獨立，唔想令大家失望。雖然普通話好水皮，聽唔明京腔，但我適應力都唔差嘅！讀書之餘，都會接job幫補吓，經濟應該唔成問題。（有咩想同師妹講？）佢哋出寫真時，我應該離開咗香港，希望佢哋到時會留番本畀我啦！」
