新婚的陳太（陳倩揚Skye）及林太（朱凱婷Heidi）今年用已婚身份大派利是，預算豪派五位數字，兩人不單止不感肉赤，更異口同聲高呼：心情好興奮呀！談到兔年願望，她倆又合拍地說：「最想生兔B！」更自爆房事，表示已經不設防啦。不過，Heidi因為機師老公經常周圍飛，留港日子不多，連「造人」都要度期，唯有採取順其自然態度。反而，陳倩揚應老人家要求，正一級努力「造人」。
過往陳倩揚和朱凱婷都大派開工利是，可是今年「升呢」做前輩，用已婚身份，大派利是給親人和小朋友，感覺截然不同。Heidi預算萬元利是，大派最愛的紫色利是封利是，她笑說：「利是乜銀碼都有，基本入場券係五十蚊，即五十、一百、五百和一千，當然派畀屋企人嘅會大封好多啦。」最搞笑的是，多年來，她都習慣和老公Dickens交換幸運利是，其實「內容」大同小異，只不過取個好意頭。
同樣地，Skye也會豪派萬元利是，利是銀碼分三級制，由二十元到三百元及五百元不等，她笑說：「我未有資格封金牛，都係畀自己多啲進步空間，唔好一下子有咁大壓力。」倩揚不會和老公交換利是，她鬼馬道：「哈哈，佢（陳浩然）乜都畀晒我喇，包括佢嘅錢。我係屋企財政大臣，除非大事先由佢作主。」
自詡為摩登師奶的陳倩揚和朱凱婷，婚後以家庭為重，過年會按照傳統習族，到老爺、奶奶及長輩家中拜年。倩揚做定心理準備，老人家一定會催促她盡快生仔，她說：「老公屬羊，我屬豬，屬兔嘅同佢哋最夾，老公經常嚷住要生個博士兔B去襯佢喎，所以都幾急造人㗎！（咁咪有好大壓力？）唔會啩，兩個都咁後生，應該唔會有問題嘅。」
朱凱婷點頭應同，她說：「老公都想生兔B，但佢成日唔喺香港，我諗要同佢夾半年空檔去補度蜜月，希望可以十擊即中。」
