o靚模除了被認定要性感外，更會被標籤為讀唔成書的o靚妹，大家都不會認為她們有內涵，極其量像周秀娜，只會評為有EQ。不過凡事有例外，被喻為「o靚模狀元」的Ivy（蔡瑩瑩）和演藝學院畢業的Bambi（梁筠兒），最近齊齊為網上電台主持節目，誓要為「冇腦」洗底，打造成另類o靚模。
最近Ivy和Bambi孖住為「香港青少協會」的網上電台U-Channel主持節目《升呢事務所》，齊齊升呢做電台節目主持訪問不同嘉賓。兩人談到這個新經驗都相當興奮，異口同聲說：「真係好開心呀！不過亦都好緊張，怕到時唔識點問嘢，所以依家都會做定準備工夫，留意多d娛樂新聞。」
Ivy與Bambi表示：「其實o靚模都有好多種，我哋希望可以走另類路線，趁住今次機會發揮我哋智慧嘅一面，證明我哋唔係冇腦，講嘢係有文有路，另外公司希望我哋可以學識自己照顧自己，可以更加獨立去工作。」
向來o靚模給外界「冇腦」形象，今次理工大學紡織及製衣學系畢業的Ivy和演藝學院舞台設計系畢業Bambi被邀請任節目主持，她們希望可以藉此洗底，令外界從新認識o靚模都可以有內涵。
除了忙於主持電台節目，Ivy和Bambi亦要為模特兒公司年底推出的月曆進行拍攝，她們大賣關子不肯透露當中造型，只表示到時大家一定有驚喜，「今次個月曆係會有故事性，大家啲造型都會好突出，總之係從未試過咁爆啦！」講到這樣勁，到時真係睇下點！
