在天氣報告中「一跳成名」的黃婉曼 （Icy），自離開TVB後工作停不了，講波、講馬、做主持及擔任雜誌總編輯，曝光層面多到嚇死人。成功賺得第一桶金後，Icy即孖攝影師男友曾志釗四出睇樓，事業愛情絕對兩得意。不過，Icy有樣有身材又有事業，其男友應該有排驚。上周一晚，Icy撇甩男友單拖到灣仔軒尼詩道一樓上酒吧玩樂，其間，三名唔同Style的男生全程在其身邊團團轉，其中父親是北區政界中人的侯姓酒吧老闆更長伴Icy左右，三人對Icy伴飲陪玩iPad送落樓兼送返歸，港女們只能得個恨字。
因為形象健康，芳齡26的黃婉曼出道無耐便成為廣告商寵兒，早前更成功泊到小小超李澤楷的碼頭，擔正在now做旅遊節目主持，出埠講飲講食又有錢收，確實是一份無敵筍工。不過，事業成功愈搵愈有的Icy，感情生活卻起了一點小漣漪。皆因女方早前突然自爆跟男友的年尾婚期將會押後，有命理學家亦指她明年「不結就分手」，但恨嫁當事人無有怕，自覺仍年輕的她，坦言目前應珍惜工作機會。
男伴團團轉
上周一晚，打扮簡單的Icy，撇甩男友單拖到達灣仔軒尼詩道一樓上酒吧，原來該酒吧剛於當晚開張，只見Icy不斷與場中人士吹水，其間，Icy獨自步出貴賓房，然後在Bar枱附近徘徊，不到半分鐘，穿格仔恤衫的六呎男即走近，伴着Icy飲酒吹水，𠱁得伊人不斷甜笑。六呎男走遠後，穿白色恤衫，父親是北區區議會副主席侯志強的澳洲留學生兼酒吧老闆攝位走近Icy，還主動幫女方Order一杯貼心的雜果賓治。
有錢仔管接送
由於當晚酒吧剛開張，侯老闆不時要行出行入招呼賓客，當獨剩Icy一人坐在Bar枱旁時，一穿運動外套的嫩口男接棒伴Icy，兼拿出自家iPad讓女方解悶，兩人邊玩邊咭咭笑，引來侯老闆注意，緊張的他即時走近，近凌晨時份，Icy由嫩口男伴住落樓，兩人邊行邊傾，氣氛相當愉快，而侯老闆早已在車中等候Icy，女方上車前還向嫩口男說了數句唔該。對於當晚被異性圍住，Icy尷尬地說：「嗰晚朋友間酒吧開張，我去捧場，食吓生蠔飲吓酒啫。（侯老闆好冧你喎。）吓，係咩？我唔知佢背景呀，但佢份人好Nice。（怕唔怕男友呷醋呀？）唔會嘅，正常交際啫。」
