24歲「咪神」徐淑敏 （Suki）有樣有腦，被踢爆年底閃電嫁飲食界才俊黃浩（Kenny）後，索性順水推舟，跟TVB請假結婚生仔，又公開激讚未婚夫，自動波做到足，難怪Kenny錫到燶。上周六（9月5日）兩人十指緊扣往卡地亞選購婚戒，又即興買價值兩萬八的訂情鈪，冧到爆的Suki化身樹熊，全程掛頸式攬實未婚夫遊街，高調晒恩愛呢招Kenny受晒。
拍拖兩個月便閃電宣佈婚訊，全世界認定Suki釣金龜，但原來兩人初相識時，Kenny刻意隱瞞富豪身份，「佢話自己係餐廳經理，人工唔過一萬，但Suki居然唔介意，仲對佢千依百順，所以Kenny咁錫佢。」知情者說。
婚期已定，是非衝着來，被指充大頭、演大龍鳳的Kenny選擇一笑置之，就連原先睇中價值80萬的Tiffany鑽戒亦在Suki勸阻下唔敢買，Kenny身邊人透露說：「Suki唔畀佢買，話驚太高調，費事招人話柄，連80萬隻鑽戒都唔恨，思想純樸，Kenny話愛死佢。」
對鑽戒無興趣
上周五（9月4日）晚，Kenny大搞告別單身派對兼慶祝37歲生日，Suki以女主人身份現身，性感桃紅tube dress，谷胸上陣，見完人，Suki又識做先行離場，讓未婚夫盡興狂歡，畀足面。
翌日，Kenny即拖Suki往卡地亞選購婚戒，穿上oversize白恤衫的她刻意遮掩身形，只見她對鑽戒興趣不大，在店內兜了一圈，便睇中價值$9,800、LOVE系列的玫瑰金戒指作為婚戒，試啱即扑槌買，還即興買下深受圈中人追捧、同系列的訂情手鈪。
買定婚戒後，兩人轉戰名店掃貨，沿途只見Suki樹熊上身般攬實Kenny，恩愛得旁若無人，最後在Prada有斬獲後才上酒店房休息。
