有「地獄廚神」之稱的吳雨霏（Kary）果非浪得虛名！於上輯火燒廚房的Kary除了被監製要求帶備滅火筒入廠，今次她繼續以評判的生命「較飛」，竟將豉油膠蓋與配料炒埋一堆，嚇到全場嘩聲四起。
前晚吳雨霏（Kary）、熊黛林及姚樂怡擔任《美女廚房》嘉賓。Kary繼成名絕技「火燒廚房」後，前晚再施其「嚇人」招數。當她炮製指定菜式「乞兒雞」時，她竟懵然不知自己將豉油膠蓋與配料一起落鑊，主持梁漢文及鄭中基發現後即謂：「好在冇火啫！唔係舊膠熔咗，我哋咪食咗落肚都唔知！」其後Kary替雞搽泥時，又被主持嘲她似玩牛屎。
死撐煮熟
未知是否經歷火燒廚房的陰影，當監製要求Kary將白酒淋落炭爐時，她死都不肯，最終要方力申代勞。當Kary完成「傑作」給嘉賓評判試食，即被評判狠批肉質有如擦膠，眾人更謂：「啲雞生㗎！點食呀大佬！」
事後問Kary是否想煮「塑膠雞」？她死撐謂：「唔係呀！嗰個係老抽蓋嚟，唔知邊個整。（你夠唔夠膽食？）OK，首先啲肉係熟，舊膠冇熔到。」其後Kary補充說：「其實經過上次之後都未煮過嘢，好唔好食係次要，今次目標係唔好燒咗個廚房，人身安全為大前提。」在旁經過的梁漢文則大潑冷水：「我會盡量離開你個廚房！」Kary又謂為了嫁得出，會抽空去學烹飪，但她謂：「我好怕煮嘢！怕拎啲海鮮。（咁網球朋友點呀？）冇㗎嘞！唔知喎！」
