馬季煞科未夠兩個禮拜，好多嘢都洗牌從頭嚟過，好似新紮師兄丁仔，話咁快已由零，搖身一變成為36駒�虪D，反觀離別隊伍，李易達悄悄引退，不帶走半片雲彩，冷眼旁觀，係就係有啲可惜，以為佢含恨敗走，霞姨又肯定唔係喎！
阿達同前騎師細佬李易學，細細個未入馬圈，一家住土瓜灣舊區天台，嗰陣霞姨已識佢哋，兩兄弟閒來街邊賣金魚，阿達老積得嚟靚仔，學仔把口啷過油，好得人鍾意，老街坊記得，應該都發出會心微笑。
臨煞科前兩日，霞姨搵阿達傾偈，佢劈頭一句，「No Worry！我有晒心理準備，亦有兩手準備，過到呢關固然好，過唔到都冇所謂，如果天意要我離開，唔會再留戀呢個地方，所以冇打算響馬會搵其他嘢做。」
「講到天意咁大鑊？」霞姨單刀直入，阿達答曰：「一隻『駕迅』睇住贏得，最後一步畀隻UFO『真跑得』殺咗；跟住『及時行樂』困一困，黃俊係細路仔，唔怪得佢，要怪就怪『巴基之友』咁勁，遲唔出早唔出，一出場就做低我，咁都唔止，跑馬地拉士嗰晚五班1650，隻『佳運喜』新降班搵定潘頓，佢朝早過完檔話Like，應承跑，點知下晝出報名，攞埋王牌都後備三，咁仲唔係天意？」
雖則話係咁講，阿達都好感恩，「做練馬師十幾年贏到名與利，醫生律師係好專業，但通街都係，華人練馬師全港得十幾個，行出嚟受人敬重，又搵到錢，係專業中�H專業，自己做到，搞得掂頭家，都算係咁！」
記得沙士往後幾年，阿達搬咗去荃灣貴價地段，響同區大手投資住宅物業，似足佢老友簡炳墀咁，搵到又剩到，生活經濟早已無憂。
https://hk.sports.appledaily.com/racing/realtime/article/20180727/58493753
