|
2011年六月，孫柏文咬住個多洋蔥漢堡皇，收到短訊話啲拍檔同我成功抽到馬匹入口證。當時真係非常興奮，估都估唔到抽到，不過同時知道前路一定有唔少會令孫柏文心痛嘅事情，我哋隻馬就係落到五班嘅「樂家將」。
四年後嘅今日，我哋眾馬迷又再一次企喺一季之末時，唔好話養隻馬王，或者簡單啲捧吓盃，甚至影幅頭馬相，又或者贏少少獎金幫補吓啲養馬費（冇錯，跑次第五得唔得呀嗚嗚！）我𠵱家養馬，只要隻馬能出賽，已覺係大勝利。呢個就係一個馬主，養到匹對上三次排位後有兩次因獸醫要求退出，會有嘅自我預期控制。
「樂家將」成績之差，係我哋一班朋友原本用嚟傾閒偈之材料，都避開唔提。有如家中嗰個被判「弱智」，考試次次包尾嘅小朋友，無人問候一樣。
我唔係家長，不過如果真係有個咁嘅小朋友，相信搵學校讀都難。而就算有學校有情有義，相信都會難到前線嘅老師。馬就當然搵練馬師，不過當你匹馬，一用手機上網㩒往績出來時係我嗰匹咁嘅樣，就會連騎師都難搵。
搞到今日，有時我喺到諗係咪神懲罰我，因為我不孝。記得四年前抽到馬匹入口證嗰日，打畀老竇同佢講。雖然我都年過三十，不過佢重拾父親嚴肅之樣子，語重心長咁同我話：「記得，千祈唔好學嗰啲戇九仔，估自己會養到馬王。」
我老竇，養過好幾匹馬，有兩匹上過一班，以前佢辦公室嘅牆，掛滿頭馬相。不過當我老竇咁同我講時，我就駁咀話：「係呀老竇，我當然唔會望養到馬王；我只係希望嗰隻唔會係『闖高峯』（老竇第一匹馬），希望第時唔會落到最低班輸畀隻零分馬（『闖高峯』曾輸畀零分馬『楊家寶』）。」我當年講完，自己大笑，老竇繼續好嚴肅。到今日我就算未有智慧去明點解唔好笑，都冇笑嘅動力。
駁咀，我知錯。神，寬恕我吧。
| 
