呢場有幾隻馬值得討論：
1. 高耀之威：當日所見隻馬急到飛起，結果起步後大部份時間都人馬角力，再加埋前段步速快到爆，佢仲要跟前走，最後點會唔散？所以佢當日有幾分似好味皇咁樣，出o黎可能只為洩火。
好啦，上星期日叫做熱完身，叫做冇咁急啦，起步後可以輕鬆跟住中間。雖然呢場步速都係快，但都有Cover。
入到直路，佢係最先發力及出頭o個隻，但最後竟然俾新通勝追到，結果又輸。
你或者會話佢形勢賺晒都輸，下次就唔使買啦。但我會覺得今次之敗，可能係佢戰略上太早出頭(當日步速之快，對後上馬係著數)、加埋個磅較重，影響到末段貫注力。
如果練者肯俾佢上二班跑，負少十幾磅下，我會覺得對佢更合適，睇睇練者會唔會咁部署。
2. 好歡騰：當日呢隻睇跑法都知佢想熱身 - 全程包尾、直路刻意入內欄衝，想搏人睇唔到，但隻馬o係內欄越衝越勁，就此走晒光。
到o左9月26日(056場次)，佢今次終於加程跑1800，你以為今次仲唔去馬？
佢個走位同爪皇泓金一樣，都係守尾門。但入到直路，杜鵬志走入內欄衝，高雅志竟然飛到五六疊衝！雖然當日係C跑道，其他場次亦有馬成功利用場地偏差由外欄殺上，但今場頭五名馬匹，全部都o係內欄及跑道中間殺上；反觀好歡騰蝕位無數下，就算今場有快步速幫助下，點可能追到前五名？
所以根本志叔當日係亂跑！
不過經兩場熱身後，相信此駒狀態會提升得更快，下次再跑同程，可以留意。
3. 算得妙：未開跑前飛數已經有9倍左右，但臨開跑前10分鐘內瘋狂落飛，明顯有人估計佢今場會搏殺。
而今次起步比之前迅速好多，足見佢比上季有進步。不過當佢放頭後，卻越放越快，結果就做出一個極快步速，轉灣時仲要外閃，搞到入直路時更由內欄閃o左去跑道中間。
而此駒領先到最後100米，後上馬先至過到佢，但卻保持走勢而冇斷到！
o係佢全程自製超快步速、仲可以放到1300米而最後唔斷，已經肯定佢有進步；如果佢能夠留到力，下次跑同程已經有贏面。。
