之前寸嘴o靚模何佩瑜（Jeana）從澳洲打碟回港，揚言豬籠入水，澳洲之旅勁賺六位數字，點會唔恨死隔籬？所謂瘦田冇人耕，耕開有人爭，o靚模着比堅尼捽碟騷吸金一呼百應，由「冬甩」成員胡心諾（Rainbow）、曾寶玲（Ar Yu）、何綽菲（Alina）、周梓盈（Ice）聯同jully girl成員金俊婷（Crystal）及亞視小花甄詠珊、譚杏藍即將組成o靚模女星DJ團硬撼，拜頂級打碟DJ Ryan為師認真學捽碟，十月初夜店出擊
寫真女王周秀娜要「升呢」，唔再出寫真集轉戰每場酬勞15萬元的比堅尼捽碟騷吸金，師妹Jeana步步進逼，打正旗號，話自己係捽碟能手，以每場8萬元筍價，誓搶娜姐DJ女盟主地位！o靚模許穎同黃榕等都齊齊學捽碟爭飯食。「冬甩」四位成員聯同jully girl的Crystal及亞視小花甄詠珊、譚杏藍組成o靚模女星DJ團分一杯羹，她們個別教授學得好認真，絕對唔係呃飯食。
暗寸周秀娜Hea住捽碟
大姐姐Rainbow話：「其實我哋最初由乜都唔識，到漸漸有初擬，相信熟能生巧，我唔覺得係執人口水尾，始終個市場咁大，佢哋唔會做得晒！」Jeana着比堅尼賣點係34C「不倒胸」，咁佢哋又點呀？Alina即插嘴不屑說：「周秀娜同Jeana的DJ師傅只係Ryan徒弟，我哋高佢一個level，勁過佢哋，專業過佢哋，唔係裝模作樣，播帶hea住呃錢！講身材？我同Ar Yu身材都唔輸蝕呀，而且我哋畀佢哋多元化，唔單只打碟，仲會唱歌娛賓。」
五位o靚模又異口同聲話唔怕夜場多「鹹豬手」，因為佢哋識得保護自己！Rainbow自爆試過在夜場被外籍男士兜心口撥酒，然後乘機幫她抹，嬲到她爆粗離場！
Alina同朋友在舞池跳舞時，俾男士乘亂摸大髀內側；Ar Yu就俾人摸過屁股，所以大家都學精咗，都係保持距離好啲！
