入行14年，周家怡早已被認定有演技有實力，在《火舞黃沙》演兔唇女備受讚賞，卻不獲無綫重用，早前在魔童王維基優厚條件利誘下，周家怡選擇出走，轉投「城市電訊」爭取更好發展，卻被插是「叛將」無心肝，「聽到唔開心，轉公司都係想多啲工作機會啫，呢邊機會多，都要多謝TVB，無TVB無我。」
訓練班出身，樣貌有幾分似李美鳳的周家怡被網民大讚有樣有演技，卻偏偏上不到一線做女主角，說到舊公司機會比較少，周家怡強調只能做好自己，其他的只能隨緣，唏噓中帶點不忿。
惡補國語闖大中華
問她當日決定離開無綫一事，她說：「都考慮咗一段時間，要走當然好唔捨得啦，返TVB就好似返屋企咁，同個個都好熟，不過我覺得機會擺喺眼前要珍惜，因為你唔知道機會幾時走，好想出去行吓，睇吓唔同嘅嘢，特別我想試吓拍戲，做女賽車手。」轉公司後作多方面發展的她近日惡補普通話，銳意往返內地發展。
女人始終要嫁人，事業正在向上爬的家怡同樣十分恨嫁﹕「依家無男朋友呀，我都好想拍拖結婚，不過唔知出咗咩事，完全無人追﹗其實隨住年紀愈來愈大，都無話有咩擇偶條件，女仔始終鍾意人照顧同錫，我希望對方係成熟，能夠照顧和啟發我，至於生BB，只要養得起，其實生幾多無問題。」
