因父之名，去年殺入樂壇的28歲Lam仔林德信（Alex），唱完歌又轉戰影圈，又係瑜伽教練，樣貌cute cute地又多才多藝，自然多女埋身。集郵表更包羅港台日靚女，其中私藏近一年的係33B「蜜桃胸」日模松岡李那（Linah）。但Alex從未承認松岡係正印，攞正牌繼續溝女。
Alex最新目標係5呎8吋高、同佢一樣28歲兼雙魚座的混血名模Mandy Lieu。Dry足幾年的Mandy強調「single and available」，索女開綠燈，Alex又肯背女去馬，齋睇兩人當晚dating春風滿面、甜笑冧樣，就知二人並非朋友咁簡單啦！
新一代索女殺手林德信，本來在美國紐約教瑜伽，09年決定回流返港，繼承父親林子祥衣鉢出碟做歌手。入行後，他先後和秦沛女兒姜麗文、陳妍希BB、日模松岡李那和王秀琳(Mango)等傳出緋聞，其中和松岡的緋聞傳足一年，但兩人一直未有正式承認戀情，但松岡自斷正後，每次訪問話題都離不開緋聞男友Alex，反而Alex繼續被影到夜蒲獵食。
新女夾到奔痹
溝女無國界的Lam仔，最新目標是年齡興趣夾到痹的Mandy Lieu，二人同樣28歲、雙魚座，又喜歡瑜伽。Mandy來港10年，多年前和台灣男星陳柏霖拍拖3年後分手，2011年忽然傳出她是「小小超」李澤楷新女，但男方一句「不認識她」，緋聞無下文。單身Mandy一直「無掛牌」，近日因和Alex合作得多，而有機擦出愛火花。
日前周六晚上十一時，紮上馬尾的Alex和Mandy現身老蘭附近的Coffee shop，二人對坐飲嘢，Mandy點了凍啡，Alex則只飲礦泉水。兩人談笑風生，Alex不時含春姣笑，女方亦回以電眼，Dating甚歡。及至發現記者，二人即顯得不知所措，尷尬樣即撇。背女偷食的Alex等的士期間顯得不安，雙腳緊張左右擺，又fing礦泉水，反而女方較淡定，陪男伴等足10分鐘，不時回望記者及揮手微笑，其後Alex索性叫Mandy先行徒步附近寓所。
「佢識同女友交代」
約會被撞破，記者致電Mandy，她淡定回應：「哦！嗰日我哋一齊做完活動，見時間夾到咪一齊喺我屋企樓下飲杯嘢囉。(好好傾喎？)佢講吓拍戲(拍緊《喜愛夜蒲3》)，我又講吓拍戲、瑜伽，同埋分享吓我去印度個trip。(大家都喜愛瑜伽？)係呀！佢叻啲！有諗過約埋一齊做，但各有各忙，未約到。(怕佢女友Linah呷醋？)哈哈，佢識得點同女友交代㗎啦！佢幾Nice，我哋普通朋友。(有無機會發展？)呢個世界邊有咁多如果。」就Alex轉嗒Mandy一事，本身認識Mandy的松岡李那酸溜溜話：「我同佢（Alex）係好朋友之嘛！邊有資格唔畀佢同女仔約會喎！」
