自2013年憑《星夢傳奇》爆出後，入行14年的鄭俊弘（Fred）撇甩「二打六」之名，今年不只在各樂壇頒獎禮狂擸新人獎，更拎埋歌曲獎，當事人話開心到爆。不過，鄭俊弘仍嫌未夠，原來他經已靜雞雞報讀美國波士頓柏克萊音樂學院（Berklee College of Music）的學士學位，償大學生心願！
31歲鄭俊弘雖然輸在起跑線，但他誓要跑快啲，追回步伐。上周他出席鼓勵年輕人發揮所長的《灣仔青年節閉幕暨才藝人匯演》，並壓軸表演，就自爆嫌自己音樂造詣唔夠，所以採用遙距on line方式報讀大學課程，他說：「好多出名嘅音樂人，好似John Myung、王力宏等都係呢間音樂學院嘅學生，所以真係好恨入學，希望用3年時間完成課程，啱啱我先交咗第一份關於爵士音樂嘅功課，其實家陣咁忙，要讀埋書都唔易捱，而且每個課程要成萬蚊美金，但都會堅持落去，因為我好想有個正式嘅學歷，希望頂得住啦。」
強調同吳若希無嘢
又貴又要花時間，但Fred強調一定會堅持落去。另外，Fred乘機澄清同吳若希的熱烘烘緋聞：「你話呀，我咁忙，邊有時間拍拖啫？」至於恨唔恨拍拖？他笑說：「我恨巡演同埋買樓多啲，我都係想置業嘅年輕族群，希望將來有呢個機會！」對於今年拎獎拎到手軟，Fred表示興奮，他自嘲：「以前我成日做獎品先生或者扶住嘉賓出場嘅帶位員，十大勁歌頒獎禮都做過唔少次，今次換個歌手身份上台拎獎，好開心，不過就提醒自己用平常心面對。」
