何浩文首次擔正電影《鴨王》，雖然「瞓身」演出做「鴨仔」，仲要長期帶住假「巨鵰」扮天生異稟；而女主角袁嘉敏就大方露兩點演出，兩人更有六場「激戰」戲份。但戲未上，反而是一籮不和是非先出籠，矛頭直指袁嘉敏。日前本報跟兩位男女主角及何佩瑜訪問，見何浩文和何佩瑜全程孖到實，袁嘉敏明顯格格不入，訪問時袁雖力圖否認不和傳聞，但見「雙何」無反應，應該不用多講啦！
何浩文第一次做男主角，雖然緊張自己演出，但聲言不會有太大壓力，不過亦承認連場激情戲，反而是體力大考驗，「真係辛苦過拍動作片，因為顧住演戲同動作之餘，又要幫女仔遮穿崩，真係好嘥體力㗎！」
激心發火
袁嘉敏戲中將有多場露兩點戲份，早前部份片段更離奇流出，聲稱搞到情緒失控的她，掛住專業演員口脗回應首次做脫星，「身體只係演戲工具嚟，唔會覺得係犧牲，所以我冇咩底線㗎！將來就算再激啲都無問題。」傳跟袁嘉敏唔妥到上臉的何佩瑜，就唱反調說：「今次露全背已經係我底線，將來咩角色同製作，就算係做主角，都應該好難打動我。」
談到不和一事，被指為眾矢之的的袁嘉敏，以受害者姿態發言，「我就唔覺自己被杯葛喎！啲新聞係邊度傳出嚟，你去問番傳出嚟嗰啲人囉！」她愈講愈有火，「我點解要檢討自己，又唔係我搞出嚟嘅！」但「雙何」全程冇幫過口。 激心的袁嘉敏難怪之後在網上再發表叫人「唔好再借我做新聞」宣言啦！
