擁34D上圍的林芊妤（Coffee）自跟達利國際集團CEO林知譽在殘廁gathering後，人氣不跌反彈，身邊更湧現大批追求者，就連江湖猛人「上海仔」郭永鴻、「男神」王宗堯都可以扯上關係，足證人前嗌慘的Coffee絕非省油燈。情人節前夕，記者見Coffee拖仔蒲老蘭，跟大隻型男全程黐到實，半夜更撇甩同行友人孖住走，但就堅拒型男跟車返歸，都啱嘅，好男人要放長線慢慢釣，25歲女終於諗通。
殘廁gathering改變Coffee一生，至少不用再踎大台做二打六，北上登台可月執十幾萬人仔，加上睇得開又玩得，在新片《壹獄壹世界——高登闊少踎監日記》重演殘廁gathering一幕，迅即被邀演出三級露點戲，工作有增無減，人氣桃花亦同步急升，身邊男伴團團轉，口說唔敢再拍拖的Coffee繼上月拖金融才俊遊ifc睇戲後，日前再拖另一大隻型男夜蒲。
場內黐到實
當晚所見，熱褲露長腿的Coffee跟兩男一女現身蘭桂坊夜蒲，四人先在夜店TAZMANIA Ballroom門外排隊等入場，可惜Happy Friday人太多，等了半粒鐘，四人決定轉場到PLAY玩，記者在場內見Coffee跟大隻型男黐到實，兩杯落肚更貼面咬耳仔，好親密。
蒲到凌晨兩點，Coffee撇甩同行女友跟型男先走，可能以為有得gathering，大隻仔顯得十分雀躍，沿途手舞足蹈，𠱁得Coffee嘻哈大笑，去到路邊等的士，大隻仔再發功，上半身黐實女方，但臨上車一刻，學精了的Coffee堅拒對方跟上車，獨自打的返歸，識吊住男人條癮先叫高招，再三強調「單身」的Coffee翌日情人節收到大束鮮花和禮物，隨即放相上網晒命，Keep住收兵慢慢揀咁話。
網上被性騷擾
身材火辣的Coffee，自殘廁一役後，身邊唔止多觀音兵，還惹來大批狂徒變態佬埋身，每次post相上網都引發變態男遐想，向她瘋狂發露骨訊息、問價勾搭，甚至有大量男性性器官相片，對此Coffee無奈地說：「他們鍾意私信來，block唔到，唯有即時delete，因有些內地客戶找我登台靠這平台，可能大家覺得我鍾意釣金龜，以為我好貪錢，其實我好易滿足，暫時唔敢諗拍拖，我仲要養家，可以的話，搵我開工，我唔介意辛苦，想靠自己。」
