近年主力北上在內地拍戲的江若琳（Elanne），自從捲入經理人合約糾紛後，反而愈戰愈勇密密賺人仔以應付六位數字官司費。早前她回港唞唞，嚟個人生大考驗學潛水，結果十日就成功考獲初級潛水牌，現更積極克服夜潛，望盡快考埋個高級潛水牌。日前下午，一潛就愛上水底世界的Elanne又約好友出海，Elanne更罕有地風騷大晒3吋事業線，莫非戀情有着落？她撒嬌說：「無呀，年紀唔細，嚟緊都想搵個Mr.Right做終身伴侶！」單身好男人收到未呀？！
下月就28歲的大眼靚女江若琳，呢幾年獨自北上打拼，為搵錢錯過好姻緣。她說：「我平均一年有十個月以上唔係香港，雖然間斷有內地和香港人追，但根本無時間開始。」Dry足幾年，難怪江媽媽成日催婚，她說：「一返港，媽咪就哦我有拖拍未？我都知年紀唔細，所以嚟緊拍拖，都想搵個Mr.Right做終身伴侶㗎！」
怕有水鬼
上月剛返港的Elanne，趁難得有個半月假期，就挑戰自己學潛水，她說：「細個睇得戲多，覺得海入面有水鬼、大白鯊等好恐怖，所以從未試過去沙灘游水。因為今年set咗目標要去學一啲自己平日好驚嘅嘢，就揀咗潛水和騎馬。」早前，她花了4千多元報名初級潛水課程，完成理論加泳池實踐再出海考試，她僅用了十日便考到初級潛水牌。她說：「潛咗落水底睇到好靚嘅珊瑚同魚仔，淨係聽到自己呼吸聲，我好享受水底嘅寧靜，個人可以好放鬆。」
日前，Elanne就變身海底導賞員帶記者去西貢橋咀探險，45分鐘水底旅程，幾咁自由自在，欣賞完各式珊瑚，仲呼籲大家要愛惜自然環境。下月13日，身為海洋大使的她將會學以致用，同一班義工潛落水底執垃圾，她說：「依家潛咗7次，有時見到水底好多飯盒、汽水罐等都會好掃興，希望可以出一分力，保護海洋世界。」
Ready Go !
見江若琳認真檢查好先跳落水，原來都有過恐怖經歷，她說：「試過在水中做『水底清鏡』時差啲出事，除咗潛水鏡就慣用鼻呼吸，索水後濁親即刻升上水面，教練話好彩水唔太深，如果太急上水隨時會爆肺或爆耳膜。」
