東輝話你知﹕蘇銘倫認真要喼弗
連121磅都造唔到
Fun組新彩池在上周三夜馬推出時平均每場約百三萬，全晚八場總投注過千萬，
到上周六沙田日馬竟然出現暴跌情況，得幾十萬一場投注，
如此「寒酸」不似是香港龐大彩池會出現的事，造成這樣的局面，
主要係彩金太低，大部分係十幾元的派彩，很難刺激起投注者興趣。
有人說易中便會分得少，這點我不同意，世上沒有易賭易中的彩池，
這個彩池推出的時候我已經這樣說，二揀一都唔容易，你玩過大細未﹖
唔係大就係細，買大開細早就成為流行語，意思已道出艱難，何況還要三揀一，隨時買一開二、買二開三，
那麼買中了卻得雞碎咁多利潤，點會有吸引力﹖東輝絕非對新彩池柴台，相反我很贊成不斷要增加新彩池，
至於如何才能吸引投注，就要靠馬會那些專家去度橋了，或者盡快在Fun組彩池加點新元素，如果有刺激性，一定會有吸引力。
上周六賽事裏，表現最令人失望的騎師應該係蘇銘倫，除了頭場「信賴」跑第三之外，其餘各駒悉數落第，
當中「又快又勁」連一一九磅過兩磅都造唔到，臨時換人騎，被罰了四千元﹔
此外，他在杜拜出賽返港後又不向馬會出示證明書，又被罰三千元，合共罰了七千元，
區區七千之數對大騎師來說也許是個很小數目，卻說明了問題，
一個當打盛年職業騎師，尤其係在國際享有聲譽者，連一一九磅再過兩磅都騎唔到，實在是有點那個了，
難怪馬會宣布蘇銘倫「又快又勁」換人時，馬迷皆嘩然，
或者有人說巫斯義都騎唔到輕磅馬，有甚麼值得大驚小怪，但你唔好忘記，巫斯義已經接近四十歲，係中年人了，
但蘇銘倫則不同，年紀比巫斯義輕得多，現在已騎不了輕磅馬，再過幾年真不敢想象了，看來非要認真喼弗不可。
蘇銘倫今年成績已遠遜於上年，這位神奇小子在我心目中一點都不神奇，賭他的座騎，最好都係先看賠率為上了。
