葉念琛的愛情三部曲叫好叫座，將於本周四（2月19日）上映的《保持愛你》是「葉念琛X鄧麗欣」又一年度勁作，以5段既現實又血淋淋的故事，把愛情最真最殘酷的一面表露人前，為求突破，Stephy將挑戰自己，演活弱聽少女既害怕又渴望墮入愛情的矛盾，至於她最終能否與側田譜出愛戀曲？則留待觀眾入場尋找答案，《保持愛你》於情人節當天作優先場播映，36間戲院全部爆滿，共收70萬票房，實在可喜可賀。
葉念琛堪稱新一代愛情代言人，在新作《保持愛你》中，以5段愛情故事來探討兩性關係，然而，跟他合作過六部電影的Stephy，為突破，要演弱聽少女渴望墮入愛河的心態，實在不容有失。
「同葉念琛合作咁耐，好有默契，亦好相信佢，初頭知道個角色有擔心，驚踩界。你知嘛，扮演有缺憾嘅人要好小心，做得唔好會影響到人，扮到好似又驚觀眾睇完唔舒服，套戲就會變咗質；所以拍之前都好緊張，我地做咗好多資料搜集，去跟有關朋友見面，佢哋好好錄埋Video畀我返去慢慢睇。」
Stephy激讚側田
Stephy跟方力申合作無數，但跟側田合作還是首次，不過，這位愛情片女王對他亦非常讚賞，而對另一位首登銀幕的新拍檔謝安琪，Stephy更深感佩服。
「側田好有潛質，但太百厭嘞，經常喺鏡頭後引我笑，但佢認真上嚟真係可以好認真，好似Ending嗰場戲，佢好努力咁去演繹角色，我好留心聽，我聽到好感動，真係狂流眼淚。至於謝安琪，更令我無話可說，雖然佢第一次拍戲，但佢好投入，我講緊對白，佢可以喺鏡頭外喊到收唔到聲，因為佢好投入角色，佢口講好緊張但仍然可以咁投入，真係難得。」
側田愛演音樂人
側田入行後拍過3部電影，全部角色皆與音樂有關，皆因這位唱作人極抗拒拍攝跟自己無關的電影，就是因為側田有份演繹當中角色，才能為電影創作一首感動人心的主題曲《無言無語》。
「拍啲自己無關嘅電影真係唔知點Handle，一直打破唔到自己嘅心魔，我知道自己太多包袱，但無辦法，我真係唔鍾意睇到自己，又驚自己表現差影響拍檔，好彩Stephy夠勁，因為佢真係好入戲，幫到我投入角色，但我對自己做戲實在無信心，反而我對首歌就好有信心， 因為首歌嘅Melody已經有咗好耐，拍完戲之後覺得首歌好配合套戲既偉大愛情感覺，加埋林夕嘅詞真係好Perfect。而稍後我會出一張入行後嘅精選專輯，呢首歌當然會收錄其中。」
怕醜仔變冧女王
胡清藍（Terry）跟葉導演亦合作過3次，之前導演都安排Terry飾演被欺凌的角色，今次終於可讓他回復真身，飾演一位既主動又多計仔的可愛港男，跟唐素琪玩一場超現實的愛情遊戲，最估不到斯斯文文的他，原來發起火同樣嚇人。
「其實導演好好，佢畀好大自由度演員，總之你Keep番個Point就得，好似有一場戲要鬧梁靖琪，劇本有好多英文粗口，但我覺得鬧人唔一定要用粗口，最後我用自己方法演繹出嚟，導演同Paco都讚好，大家都估唔到，原來我可以咁爆。至於角色上，終於可以唔使做苦情男，之前成日俾女仔蝦，今次我可以好主動追女仔，我覺得好好玩又好Sweet。」
