雷凱欣（Vonnie）拍輯電玩廣告時，「乳」出驚人地表示自己雖是單身，但潮流興拉斯維加斯結婚，不排除閃電結婚之餘，更學定辣身舞，為愛侶增添閨房樂！
雷凱欣昨日以網上電玩遊戲《夢幻舞曲》代言人身份拍輯廣告，身穿corset與超迷你短裙的她，化身SM女郎，更與男模大跳辣身舞，Vonnie笑言男模是怕醜型，所以已預先着他放膽些，任摸唔嬲。問她會否過於惹火而辣㷫對手？她表示與男模十分相熟，對方已將她當作男仔看待。


成櫃內褲未着過
Vonnie透露自己有上堂學辣身舞，說：「其實我一向有跳舞，追求性感舞蹈。（有冇學埋鋼管舞？）冇，都有學玩櫈嗰種！（表演畀男友睇？）有用都會！但依家未有男友，得個恨字。朋友話我第日可以着cosplay畀男友睇喎！」

着cosplay、學跳性感舞蹈，是否為增加閨房樂趣？Vonnie又突然轉口風：「都唔係，對影相擺甫士好有用，會自信啲，舉手投足更有女人味！」她又表示自小已收集性感內衣：「我有成櫃內褲都冇着過，早前仲發覺有啲白色內褲都變咗黃黃哋！」


認識一日可結婚
近日爆出多宗藝人秘密結婚，Vonnie表示潮流興在拉斯維加斯註冊，故此自己也不排除閃電結婚，她更不諱言認識一日就可以結婚，她說：「我班朋友話去拉斯維加斯玩，仲話介紹男仔畀我識，我話唔使，介紹老公畀我識就得，我仲笑住同佢哋講，我會唔會結埋婚返香港呢！」

Vonnie經常性感示人，會否難搵男友？她坦言不擔心，因自己有底線：「呢個年代性感係美麗事，邊有男友唔鍾意自己個女朋友性感㗎！」