出道3年的女子跳舞組合HotCha，近日終於推出其首張大碟《Shall We Dance Shall We Love》，11首新歌中，除破天荒收錄三位組員的獨唱歌外，成員Regen和Crystal更首次嘗試作曲，加上小試牛刀的國語歌，一張專輯包含多種新元素，出碟誠意絕對可嘉。在現今香港樂壇，可以保持年年有碟出兼有機會作曲實屬難能可貴，所以HotCha兩位隊員（Winkie因抱恙缺席）皆非常感激公司的栽培，自言會多加努力，希望未來日子能衝出香港，在此預祝HotCha新碟大賣特賣。主持：黃栢高統籌：林永匡 協力：廖思慧、袁東亮
HotCha一到達訪問地點，Regen已立即在新碟上簽名，一邊寫下上款「Dearest Paco」的她一邊開心地說着：「入面第一次有我哋嘅Solo歌。」接着，Crystal補充：「都係我哋自己作㗎。」然後將大碟送給我，看得出她們很開心，做歌手的，能看着自己的心血面世的確是一件值得高興的事，所以談到心血，Regen及Crystal皆說到停不了。
Crystal：「今次同以往好唔同，以前我哋啲碟只會有一個監製，但今次搵咗好多監製，希望可以有唔同嘅音樂元素放落新碟入面。所以今次除咗有CY外，亦有王雙駿，我好欣賞前者做嘅快歌，而同其他監製合作亦有好多新火花，喺做碟過程中我哋都好開心。」
Regen：「我哋出道3年，第一年係嚐試階段，第二年係一個肯定，到第三年要去堅持實在有難度，所以我哋今次嚐試唔同風格嘅歌，例如今次多咗慢歌，除咗快歌外，我哋都可以唱慢歌㗎，希望畀到歌迷新鮮感。而且今次專輯見街時會分兩個版本，分別是《Shall We Dance》和《Shall We Love》，同樣有11首新歌，但《Shall We Love》會附送《對我有感覺》MV和一條金屬頸鏈，而《Shall We Dance》則會附送《變大》的MV。兩個版本都有不同封面和包裝，歌迷應該都會好鍾意。」
第一次的興奮
沉寂多時的香港樂壇依然未有起色，但HotCha除能保持年年有碟出之外，在新大碟中更有機會嚐試作曲，實在非常難能可貴，雖知道香港不少歌手出道多年，連一次作曲機會也沒有，所以難怪HotCha談到自己的第一次依然感到興奮。
Crystal：「我作嗰首慢歌叫《井底娃娃》，代表我自己，因為只要我一投入段感情，就會將對方睇到好大，自己就會變得愈嚟愈細，好似從井底望上天咁，我將自己嘅性格講畀林若寧聽，佢就填咗呢首詞畀我，第一次聽我已經好滿意。今次畀自己90分，因為覺得自己嘅表現可以再好啲。」
Regen：「由細到大都好鍾意跳舞，所以出Solo兼可以自己作曲，我就作咗首電子味好重嘅跳舞歌《Cheeky Girl》，由小克填詞，因為Melody好外國，所以填上廣東詞遇到唔少問題，但我又想堅持自己嘅概念，所以都搞咗好耐，但小克好好，佢好肯聽我意見，我哋互相溝通，為首歌花咗好多心機，學到好多嘢之餘亦令我非常開心。而我就畀自己95分，希望歌迷多多支持。至於Winkie呢，雖然今次佢未有作品發表，但佢嚐試喺新歌《玉子》中加入Rap，佢一向好鍾意Rap㗎，所以佢唱得好有Feel，我哋都覺得好啱佢唱。」
樣樣都想試
香港歌手都會嚐試多線發展，HotCha亦唔例外，電影電視劇皆參與過的兩人，對於種種新嘗試皆蠢蠢欲試，年輕人應有的朝氣及正能量從她們身上完全感受得到。
Crystal：「我好想試下做舞台劇，因為我覺得挑戰性好大，又要演又要跳又要唱，兼唔可以NG，技巧性好高好高，對我哋三個係一個好大嘅挑戰。」
Regen：「我好鍾意拍戲，因為好好玩，所以我好想試下拍鬼片，但人哋話拍過鬼片會霉㗎，所以我都唔知點。同埋我見到戲入面嘅人打交，我又好想跟住打，不過我知做打女好辛苦，一步步嚟啦。」Paco Crystal Regen
