經常被發現拖女夜蒲的無綫金牌監製錢國偉（ Wilson），昨日都被廉政公署拘捕。曾數臭 Wilson逼她出席老細飯局而被飛出《美女廚房》的美味天使豆沙包梁懿晴，昨日跟 Wilson劃清界線說：「我同佢唔 friend。」但揚言會上網跟進事態發展。

身為無綫節目《美女廚房》監製的錢國偉，因為頻頻與一班美味天使夜蒲而被指花弗，去年更有報道指美味天使的豆沙包梁懿晴不肯出席老細飯局而被 Wilson轟出《美女廚房》，其後 Wilson作出反擊，聲言是因豆沙包工作態度懶散而被踢出局。
跟 Wilson不和的豆沙包，昨日在電話中被問到 Wilson被廉政公署拘捕事件時表示意外說：「我好意外，一陣要上網睇吓進展。我同佢唔 friend，對於佢為人真係唔清楚。我諗咁大件事，廉署邀請得調查，相信真係要交畀佢哋去搞，我唔熟悉法律，都唔方便畀意見。」
被指深得 Wilson痛錫的美味天使春卷王寶寶同樣感到意外，她昨在電話中說：「 Really？好愕然，我唔知呢件事，唔知可以講乜嘢。」會否致電或發短訊問候他？春卷說：「我諗最好唔好啦，相信好多人傳短訊畀佢，等件事淡啲先。」

另一美味天使藍莓劉俐昨日在無綫將軍澳電視廣播城出現，對於 Wilson被拘捕，她顯得十分避忌，問到有否跟他聯絡時，她說：「冇，唔知佢係其中一個，唔講啦，我要上去做嘢。」
此外，餐包陳家穎和柑桔陳蕊蕊均對 Wilson被捕表示愕然，柑桔說：「我上星期見過佢，希望佢冇事啦。我唔會打電話騷擾佢，會 send sms問候佢。」