周秀娜（ Chrissie）今年一口氣接下四齣電影，其中與林峯合演的電影《抱抱俏佳人》正在上映，談及《抱》片時 Chrissie竟興奮爆料說：「林峯雙眼無時無刻都喺度放緊電！」


在電影《抱抱俏佳人》中，周秀娜飾演主動求愛的女生，最後卻不知不覺成為林峯跟楊千嬅之間的第三者。為免粉絲被電影誤導， Chrissie日前澄清說：「我喺現實生活中，未試過做第三者，又未試過主動追男仔，我係好難鍾意人嘅，一定要由朋友變成情侶囉。」


說到戲中跟林峯的大膽親熱戲， Chrissie即爆林峯對戲時怕醜仔上身：「因為拍片唔係一 take過搞掂，我記得都拍咗好幾 take。開頭同林峯傾點拍嘅時候，佢已經成塊面同耳仔紅晒，真係好搞笑，好在拍嘅時候有清場，加上導演帶住我哋，所以好快投入角色。」
與林峯朝夕相對，問 Chrissie可會日久生情？她笑謂：「冇辦法日久生情呀，因為佢對住千嬅多過對住我，不過林峯雙眼無時無刻都喺度放緊電，所以當我知道要同佢對戲，我都特登儲定幾日電！」
在過往的電影中， Chrissie擔當花瓶角色，以性感造型搶鏡，所以她很感謝導演黃真真讓她在《抱》片中有發揮演技的機會，她說：「其實當初入行做 model都係為咗做演員，今年真係可以放多啲時間喺電影上，我好多謝真真搵我拍呢齣戲。」