「翻版大S」Liz（李莉琳）早前忙於在上海拍攝電影《宅男總動員》，與鍾鎮濤、方力申、鄧麗欣等合作，戲內飾演剩女幫其中一位成員，因拍攝太辛苦返港即告病倒。既然工作這樣辛苦，近期密密接騷，搵埋唔少的Liz，當然要好好獎勵自己。日前本報記者就在圓方商場發現Liz出動，專攻名牌手袋，但就買平價衫，認真識使錢。
Liz自從年初簽約成為施念慈旗下藝人後，工作量雖然不及身材出眾的師妹「百果園Ｅ神」DaDa多，但也算不俗，早前還有機會接拍電影《宅男總動員》，跟鍾鎮濤、方力申、鄧麗欣等合作，戲內飾演「剩女幫」其中一位成員。
辛苦冇怨言
對於在電影中飾演「剩女」角色，Liz早前還表示已有一段時間沒有拍拖，飾演「剩女」可謂入型入格：「我『剩』？好耐？！不過冇所謂，我唔介意忙到冇時間拍拖，即使喺上海拍戲好辛苦，捱到返香港病咗幾日，我都唔會有怨言。」
雖然沒愛情滋潤，但密密接工作賺錢的Liz，自然要趁聖誕買禮物獎勵一下自己。日前Liz被本報發現到圓方商場逛街，專攻名牌手袋，最後購了價值萬多元的Gucci手袋。不過講到買衫，Liz就沒有揀貴嘢，反而到H&M購買減價到100元的背心，咁識使錢果然叻女。
Liz直言角色是臨時調配，令她十分開心：「我原本嘅角色戲份好少，但同導演傾完偈之後，佢發現我表情多多，國語又講得唔錯，所以臨時調咗呢個角色畀我，有好多發揮機會，又要做臥底、又要扮男仔，雖然工時長咗，但我冇計較人工有冇多到，最重要有機會。」
