o靚模代代有，想當年以43吋長腿殺入模界的陳敏之，現已在無綫穩佔花旦一席位；年僅18歲的陳嘉桓同樣以43吋長腿殺入行，更積極轉型做打女。兩代長腿女神，靠雙腿走出不一樣的路，不認同現今的模之「露」。
出道以來鮮有緋聞的陳敏之，靠一雙43吋長腿打拚，早前在《怒火街頭》中更被封「索腿天后」，可謂當之無愧！她笑言護腿秘方是「天生麗質」，認真令人恨得牙癢癢：「一向都好少做運動，只係間中落街緩步跑。以前讀書就好喜歡跳高，仲攞咗唔少獎牌！」理論上，身形高挑應羨煞旁人，但敏之直言小時候曾因一雙長腿而勁自卑：「小學五、六年級時，好多同學仔都未發育，但我已經生得高頭大馬，喺佢哋眼中會覺得我好怪，當我係巨人，經常成為同學笑柄，甚至杯葛我唔同我玩！當時真係好唔開心，唔明點解同人咁唔同？仲試過返屋企問媽咪：『不如你帶我去做手術，將啲手手腳腳切短啲！』媽咪同我解釋：『你大個就知道好，人人都恨有你呢個高度！』。」
自薦成功 阿媽反對
小時侯的敏之不明白開始踏入美麗人生的首步，促成的自卑感卻使她渴望得到別人的認同。直到14歲，她鼓起勇氣寄相往雜誌社自薦做模特兒，成功一擊即中，敏之說：「好多女仔都有明星夢，我能夠被揀中當然好開心，但媽咪嗰陣好反對，但我應承佢唔會學壞，媽咪見我咁堅持，最後都陪我去Casting。」
年紀輕輕當上模特兒，敏之不諱言已是「模老祖」，但「此一時彼一時」，現時的模風氣已大不同，她說：「以前好正經，唔使露胸，而係要去演繹一件衫。反而依家嘅模唔單止多好多見報機會，行出嚟都明星啲。」現在的模經常被視為低俗的一群，但這位師姐卻另有看法：「我唔會去評論，但我承認模特兒呢行係踏腳石，依家佢哋行出嚟真係好唔同，起碼多咗好多人喺身邊照顧，唔似得我哋以前咁乜都一腳踢。不過，對我嚟講係一個好好嘅訓練，我試過用十五分鐘轉妝整頭，唔使人幫手都搞得掂。」
感激男友 未急結婚
敏之在娛圈打滾多年，認識到胡杏兒與楊怡等大班圈中好友，與契姐伍詠薇更是特別投緣。每年伍姑娘與老公慶祝結婚周年紀念，敏之比兩人更着緊：「我哋性格好似，鍾意講義氣，每年佢同老公慶祝結婚周年，我都有份參與，今年仲攞埋個蛋糕入電視城同佢哋慶祝，多年嚟見證佢哋嘅恩愛，亦教曉我要珍惜眼前人。」敏之與男友William拍拖六年，組織家庭是遲早的事，但她直言仍不着急：「之前大病嗰陣，男友喺身邊照顧我，好感激呢份恩情。但我唔做嘢會身痕，一開工就精神，屬典型工作狂。」除了拍劇外，敏之最近還主持《香港玄案》，認為兩者皆得到滿足感：「主持要做番自己，但拍戲就要演繹唔同角色，如果將來有機會，最想挑戰飾演智障人士，肯定有好大發揮空間。」
大病之後
人總會有惰性，敏之自言以往經常「有藉口」拒做運動，但大病過後明白健康可貴，近月已的起心肝學習氣功，她說：「拍劇成日捱夜，如果冇健康體魄真係唔掂，練氣功可以平衡五臟六腑，人都會精神啲，仲冇咁易病！」
圈中高妹屬稀有動物，年僅18歲的陳嘉桓（Rose）正是其中一人，中學時期已「高達」170cm，在同學眼中是一個「小巨人」，她說︰「中學嗰陣算係最高嘅女仔之一，中一已經有167cm，之後仲高落去！身邊嘅男同學有部分都矮過我，所以佢哋都叫我做『高妹』，唔會叫我個名。可能因為生得高，佢哋都覺得我係個男仔頭多啲！」身材高挑的她理論上在球類運動應佔盡優勢，問到有否參加校隊代表學校「征戰」？她卻擰擰頭說︰「有老師叫我參加校隊打波，但細個嗰時身體好差，唔係成日都會做運動，所以最後冇參加到，只係玩過田徑隊跑步。」
擇偶講夾 長短戀OK
43吋長腿帶來事業上有較多工作機會，但要找個襯得起的男友，又是否一樣順利？Rose認為找男友不在乎高度，更不介意「長短戀」，她笑說︰「我搵朋友唔係睇高度，矮過我有乜所謂，最重要係大家嘅諗法同夾唔夾，但依家唔會拍拖住，都係做嘢先啦！」17歲擔正《葉問前傳》而開始為人熟悉，加上與無綫小生林峯的緋聞傳得熱烘烘，Rose近期可謂人氣勁升，又密密出騷搵銀，令人覺得她欲撇甩打女形象。不過事實並非如此，Rose將有一部動作電影上畫，她說︰「部戲我會玩唔同嘅兵器，都係一個打女，但之後我會試唔同嘅角色，將來如果打唔到都可以有其他角色演。」
抹黑之後
訪問當日剛傳出Rose整容的負面新聞，追問是否屬實，她即反應甚大地說︰「冇！14歲就出嚟做嘢，大家睇住我大，有冇整容唔需要解釋咁多。冇諗過會畀人咁寫我，依家18歲仲有得發育，無論係個樣定成個身體實會有唔同！」
