親身睇完四場國際賽後，今次真正認識到何謂優勝劣敗，同時亦提供好多有用教材俾大家。
逐場逐場講：
香港短途錦標：
蓮華龜冇得好講，今次就算明顯落腳轉慢、變速比上次慢，都只係用200米搞掂晒！完全係一匹馬王級數o既馬，先可以做得到呢樣o野。今次之後，其實係時候要上一哩啦！唔好再跑短途。
喜皇寶、騏綵、燦惑、陽光都跑回本身實力，合格有餘。
安小姐臨場見佢神色、狀態有好大疑點，呢樣o野如果擒日臨場有聽我講o既人應該知道，我話隻馬好似有o的怪。結果跑唔出水準之餘，直路仲要逆噴射！:llll: 同時賽後報告亦應驗o左我賽前所講o既o野：晨操係可以呃人！
被查詢有關「安小姐」的差劣表現時，廖偉德解釋，原本打算自外檔出閘後上前，他在早段必須催策坐騎，坐騎因而難以穩定走勢，走勢欠順。他說，過了八百米處轉彎時，「安小姐」沒有轉腳，錯腳競跑。他說，「安小姐」沿途走外疊，入直路前在一段短途程上取得遮擋，但其後衝刺乏力。他認為「安小姐」表現欠佳的主要原因是首次在右轉跑道上競逐跑錯腳。
早o係星期六心水區分析、甚至星期五某個貼，已經強調就算晨操點樣訓練到右轉冇問題，一到實戰(特別係一級賽)，絕對係兩回事！而家廖偉德之解釋，已經證明到呢一點；同時對一匹初跑右轉o既馬o黎講，一o黎就整個12檔，仲要係一級賽，點跑？結果全程人馬角力、搶口、走勢不穩，就o係呢匹澳洲最佳短途馬上出現！
所以，睇馬係要睇整體，馬王級分子都有本身弱點所在，去到一級賽都要講形勢、馬匹能力、騎師發揮。(呢一點去到香港杯更加明顯，陣間再講。)
香港瓶：
狄倫賽前講過話隻馬狀態有疑點，去到臨場更加證實到，畢竟今季硬杖太多，臨場所見狄倫已經唔夠銳。就算唔阻唔盛，最盡只能有獎金收，而唔可以贏到。
一般歐洲大賽馬去到12月，唔係退役就係休息，除非有部份馬房，部署上專登係將部份馬主攻秋冬賽期(事實上高多芬係呢方面專家)，否則一般而言，好多馬去到呢個月份已經係體力下降。所以今場頭三名馬匹，佢地雖然10月都有出賽，但都o係10月搏完後，有足夠時間休息，所以體力及狀態上仍然佔到優勢。下年歐洲馬來港的話，最好留意佢地個近績及出賽時間，作為選馬其中一項指標。
活力金剛跑到拉停，仲要去到氣管多血，打比後遺者下又一受害者。上季打比頭三名：冠軍廊到而家只能踱步、俊歡騰狀態回復唔到上季水平、而家連活力金剛都打柴，唉~~~~
香港一哩錦標：
頭先講到高多芬係部署秋冬賽期馬o既專家，今次o係奇速達身上可以睇得到蘇萊係部署高手。
易手後先贏一場G3、冠軍錦標輸後索性送回杜拜訓練，結果係當佢到港後，不論狀態、適應力都比其他外隊馬好；再加埋佢本身質素及戴圖理之騎功，僅敗於好爸爸只係運氣問題。但不得不配服蘇萊，唔將威滿蹄放落一哩，反而將呢隻所謂「二線馬」轉o黎呢組跑，幾乎可以爆！所以油王成功唔只係靠錢，冇個好Trainier有好馬都冇用！
至於奇速達，下年返歐洲一定可以成為威滿蹄二號。
好爸爸只能用鬥心強悍呢四個字，去形容佢今次出色表現。但命運呢樣o野，唔到你話唔信：
上年，星運爵士以ISG身份、配上杜利萊，結果險勝好利威。
今年，好爸爸同樣以ISG身份、又係配上杜利萊，結果都係險勝，不過對手就換成奇速達。
同樣，「冇個好Trainer有好馬都冇用」，睇睇贏完之後，個個都對住袁生講「袁生你轉得好」，佢仲要笑埋，唔知安爺呢刻點諗呢？
同場好多RW兄弟，都加送好多說話去潤安爺。:yyy:
至於其他馬，藝術瑰寶一見到莫狄咁樣出閘，唔輸就假啦！:rrr: 俊俊狀態始終回復唔到最佳水平，要睇多場先。步步穩今季好似冇晒咁，搞乜？
香港杯：
呢場係一個教大家大賽中如何走位、騎師臨場發揮o既好教材。
其實全場分出勝負o既位置，係轉灣o個陣。當時威滿蹄好似有o的搶口，但實況係：戴生已經由內欄拉出去中間走生位！
反觀o係佢後面o既爆冷，能叔仲死守o係內欄。
結果入到直路，威滿蹄除o左即時望空成功外，戴生更識得利用合法封位，順手封埋爆冷個跑線。
而能叔本來入直路初段仲有機會可以撬到位，拍住威滿蹄衝。點知能叔好似遊魂咁，唔識得即時拉出去走生位，結果咪俾威滿蹄及關之影一齊夾死，仲要抽一抽先搵返位衝，真係輸得樣衰！
所以，一場一級賽，當馬匹實力、狀態、形勢接近，往往係要睇騎師點樣發揮、臨場點樣執生，先可以發揮到馬匹最高水平。今次戴生同能叔，就做o左正面及反面教材俾大家睇！
不過同場有隻馬表現，真係令人神傷！就係凌雨！
本來見佢出閘埋、又留到最後衝，以為係因應檔位較差先有咁o既戰略，但當睇到佢衝上o黎個勢，我只能用力不從心四個字去講。希望我真係睇錯，否則如果下次仲係咁o既話，我好希望馬主及霍生，認真考慮提早將凌雨退役，唔好再俾佢o係跑道上受苦！
[
本帖最後由 Running 於 10/12/2007 11:40 AM 編輯 ]
