隨住冬季來臨，日落時間提早下，日馬跑到第八場左右馬場已經要開燈，第九、十場更加變相係跑夜馬。
o係咁o既情況下，尾場之走位往往會比夏季較為特別。
好多時騎師會刻意跟前、走二疊而唔切入內欄；入到直路甚至刻意飛出跑道中央及外欄走，寧願蝕位都唔會死守內欄。
結果就做成：前領馬較易入到頭五名；好多馬飛出中外欄走。
有呢種情況，固然係避免o係內欄塞車，但另一方面或者同馬性有關。
之前聽過o的前輩講過，馬匹係一種怕影子o既動物，有時有o的馬跑跑o下突然跳躍，賽後報告就會話跳影。
此外，當o係夜晚競賽途中，由於有燈光照落跑道，馬匹o係怕影、加上怕被阻o下，走內欄係必死無疑。
呢種情況就往往輕易俾前領馬走甩，中、後上馬匹往往因為需要時間取位，就此後追不及。
所以當11月中開始，沙田日賽之尾場賽事，頭三名馬匹幾乎係以前領戰術、或者入直路走外疊之馬包辦。
反觀走內欄o既馬，唔係被塞死、就係望空太遲下致敗。
我地就用場次196(11月25日)，2班1800做例去睇睇：
頭馬厚利多，本身全程跟守第四、五位左右，但柏寶冇刻意走入內欄，反而蝕少少位走二疊，
結果入到直路佢配合埋步速優勢走甩對手。
至於第二、三o既友誼至上及皇仁飛駒，際遇又如何？
友誼至上雖然係留得較後位置，但杜利萊卻沒有刻意切入內欄，反而仲走二疊；
入到直路，更直接從跑道中央取位打後上，但因為已經被厚利多走甩，結果後上不及跑第二。
皇仁飛駒位置同友誼至上差唔多，不過巫斯義卻走內欄，入到直路結果仲o係內欄上，
結果卻多次被阻下，到最後100米先至有位上，跑入第三。
而同場有兩隻馬：寶樹勁盈、玉蜻蜓，佢地o既際遇就差好遠囉！
我地睇睇兩匹馬o既走位圖、以及賽後評述點講？
寶樹勁盈：
出閘緩慢，居後，落後七至八個馬位。步速普通，無助發揮。直路彎搶口。入直路時在內疊接近包尾。雖沒有足夠空位，但追前多個馬位，末段未能全力發揮。
玉蜻蜓：
從外檔出閘留後，落後七至八個馬位。步速不利發揮。入直路時落後甚遠。直路上在馬匹之間穿插上前，追前甚多，但未能完全望空，過終點時最為接近。
你或者認為今場馬匹較多，走內欄容易塞死，未必同夜賽效應有關。
而且當日所用o既C欄，往往轉灣時會將唔少馬拋出去，由內欄取位應該比飛出去更著數。
但事實呢場有唔少騎師刻意飛出外疊衝，好似刻意避免由內欄取位，
會唔會就係騎師意識到馬匹o既「怕影」本性，所以唔會刻意走裡面，以免馬匹唔敢打衝鋒？
所以踏入冬天時，大家睇尾場o個陣，要小心一o的走外欄衝o既馬，
佢地可能係利用呢種優勢去賺賽事形勢；相反，一o的係內欄衝同時又有走勢之馬，
大家可能需要更加多花眼力去睇實，呢o的馬咁夠膽走呢o的「死位」上，馬匹冇咁上o下膽色都做唔到。
P.S.以上純粹個人研究，應該有不少錯漏之處，希望各位能夠坦承指教，本人會虛心接受意見去改進。
[
本帖最後由 Running 於 17/12/2007 04:14 PM 編輯 ]
