各位，阿寧點將錄又同大家見面啦。今次新嘅點將錄，相對會比以前寫得簡單啲，唔會太長，等大家可以睇得輕鬆啲。

除咗我會主動介紹新馬之外，如果有咩馬想問，歡迎大家提供，我會盡快解答。

同時本文會上載到RW賽馬台網誌，歡迎各位瀏覽。

10月26日 - 金龍
10月27日 - 騏名燈
11月6日 - 鑽石巨匠
11月7日 - 皇子

[ 本帖最後由 Running 於 9/11/2014 07:32 AM 編輯 ]

「金龍」出自南北半球其中一匹最紅父系「灌木叢」(High Chaparral)，由於南半球嘅同父馬近幾年成材率高，不少血統稍好嘅周歲子嗣價格，最少要十幾萬澳元 / 紐元，如果再結合一個靚嘅母系血統，咁4,50萬 或以上一定走唔甩，「金龍」就係其中之一。

「金龍」嘅媽媽Bombay本身出自Encosta de Lago，出賽只係贏過兩場就退役配種，「金龍」係佢嘅第一胎，基於呢個原因就好難估計到Bombay是否為成功母系，但係馬會買手咁夠膽出到48萬紐元買入，相信係睇中母線第二、三代血統，因為會發現第三代母系子嗣中，就係誕下近年最紅種馬「燈塔島」(Fastnet Rock)，「金龍」賣到咁貴原因就係咁。

另外再睇埋Bombay及成個母系子嗣，贏馬路程集中喺短途，所以大家見到「金龍」試幾次短途閘，都可以見到佢幾有速度；不過，「灌木叢」係一個遺傳力甚強嘅父系，就算係南半球子嗣嘅母系有短途血統，都係跑中長途至發揮到威力，可以預計「金龍」將來點都係向長途發展會更好。

雖然「金龍」係Bombay嘅首胎，但睇返母系子嗣成功率甚高，可以估計「金龍」能力唔會差；而且呢幾次試閘所見好肯追馬，最近一次甚至俾馬撞，過終點前都肯撲返上嚟，一匹冇出賽經驗嘅三歲馬有如此表現，其鬥心及質素並不簡單，估計長線有力上到二班頂，值得高度重視。

至於今場點睇？目前跑一千問題就不大，不過晨課所見仍然有好大汗濕，反映出佢心智上未算好安穩，亦說明未係好熟，所以捧場前最好睇下佢臨場情緒有冇問題，再決定是否擺錢落去。

[ 本帖最後由 Running 於 9/11/2014 07:30 AM 編輯 ]

今日收到讀者查詢，話想知道星期三初出嘅「騏名燈」係咩來頭，所以今期就講下呢隻。

未介紹「騏名燈」前，先介紹父系Iffraaj，服役時屬於高多芬旗下戰馬，服役時13戰得7冠1亞1季，包括兩場2級賽，另於7月杯得一席亞軍，取勝及上名路程集中於1200-1400米。雖然服役時成績並非出眾，但擔任種馬後子嗣表現非常爭氣，目前已經有4匹子女在一級賽取勝、另有10多匹子嗣在級制賽中取勝，取勝路程集中於短途外、也有不少子嗣擅跑一哩至2000米。值得留意一點，基於Iffraaj配種成績出色，Darley英國分部已經決定新一季加價至22,500英磅，可以預見將來會有更多優質雌馬提供予配種，進一步提升子嗣質素，係一個值得長線跟進嘅種氏。

而「騏名燈」媽媽Rijeka，服役時喺1600-2400贏咗7場，包括兩場級制賽，不過成為媽媽後就認真麻麻，連同「騏名燈」在內生咗六胎，得兩隻有出賽記錄，包括曾經喺香港服役嘅「競秀精神」，都贏唔到馬，以此推算Rijeka嘅配種成績完全唔合格；再睇返母線第二、三、四代子嗣，勝出率高之餘亦要跑得比較長，就咁睇呢個母系以遺傳長力為主。

如果就咁睇血統，「騏名燈」能力好似唔高，但睇返兩歲試跑後價格比周歲時升咗唔少，似乎買家覺得此駒能力唔差，加埋外地同來港後試閘，都見到佢有唔錯嘅速度，加埋Iffraaj子嗣谷草性能不俗，所以「騏名燈」喺中班谷草短途應該有唔錯嘅前境。

講到今次機會，我會建議睇下臨場情緒再決定係咪擺錢落去，畢竟佢係未試過谷閘，點都要睇下先決定。

[ 本帖最後由 Running 於 9/11/2014 07:30 AM 編輯 ]

週末第三場有好多隻新馬出戰
鑽石巨匠、紅旗福將、皇子試閘表現都極好
可否請Running兄擇一心水介紹下呢

收到讀者查詢，想了解下星期日啲初出馬，由於時間關係，我今日先介紹姚本輝馬房嘅「鑽石巨匠」。




Not a Single Dobut呢系馬由於早熟擅短途，整體子嗣有一定戰鬥力及質素，所以呢幾年相當受香港馬主歡迎。「鑽石巨匠」係姚本輝舊年喺墨爾本周歲拍賣會用13萬澳紙投返嚟，以呢系馬嚟講身價算幾貴下。

睇下母線血統，媽媽Sandy Desert係美國馬，贏過一場1400米，由於血統背景不俗所以成為咗配種牝馬，連同「鑽石巨匠」在內嘅四匹子嗣，有一匹已經出賽而未有馬贏，另外一匹同「鑽石巨匠」嘅全兄弟馬Desert Fox就運咗去新加玻，頭兩場已經取得兩捷，目前已經取得4W；而另一匹同父同母子嗣就啱啱轉兩歲，巧合地呢三胎育馬者都安排都係與Not a Single Dobut交配，如果睇返Desert Fox喺新加玻有咁好表現，似乎Sandy Desert同Not a Single Dobut幾夾下。

再睇埋第二、三代母線，可以見到唔少子嗣屬有長力之輩，可以跑到1600至2000，似乎母系擅於遺傳氣量俾仔女。話雖如此，Not a Single Dobut係一個遺傳力甚強嘅父系，唔少子嗣就算下線有長途背景，都係擅跑短途為主，再睇埋試閘時此駒速度十足、出腳急密，完全係跑短途嘅材料，相信「鑽石巨匠」又係同其他同父馬一樣，係一匹短途快馬。此外，呢系馬谷草性能特別出色，以佢本身速度感如此高，日後專攻谷草短途會比田草更有出路。

不過再睇返呢三次試閘，冇錯論速度係唔錯，但走規上仍然未十分成熟，仲係有擺側個頭及兩頭片嘅情況，今次仲要執個2檔，都係睇一場先；長線而言如果再成熟啲，相信係一匹幾有用嘅三班短途馬，轉跑谷草就更加要留神。

[ 本帖最後由 Running 於 9/11/2014 07:29 AM 編輯 ]

另一匹較受注目嘅初出新馬，就係神仙馬房嘅「皇子」。




一睇到「皇子」係出自Exceed and Excel，都唔使點多講呢個父系特色，特別係出自南半球嘅子嗣，一句講晒：早熟、跑短途，所以會花時間講下「皇子」個母線。

「皇子」嘅媽媽Majestic Harmony，本身出自另一名種Encosta de Lago，不過Majestic Harmony係冇出過賽下成為配種牝馬，連同「皇子」在內合共誕下四胎，其中一匹與Redoute’s Choice交配所生嘅Cherish Harmony已經喺短途贏咗兩場；再睇埋母線第二、三代，擅跑中短途之餘，每匹子嗣都係多捷馬，成材率甚高，相信Majestic Harmony可以將母線嘅優點，遺傳到子嗣身上。

如果睇到「皇子」嘅烙號，相信都知道呢匹馬好早就到港，由前季兩歲時好早就開操，到三歲初試咗五次大閘，每次都見到佢交出好走勢，本來可以及鋒而試，可惜試到第五次閘就流鼻血，被迫休息到而家先再出，考慮到健康問題，相信馬房今季會用得就用。

論馬「皇子」身型大隻、噸位十足(有1228磅)，睇腳法又係相當急勁，結合血統相信跑短途一定係最好，不過我嫌佢今季只試過一次800閘就出嚟跑直路1000，準備程序上有啲唔夠，寄望今次可以用質搭夠；長遠計健康正常嘅話，可以贏到80分左右，今季跑短途時刻要睇實。

會唔會講父系? 想問問 mastercraftsman 及 murtajill