馬偉昌決定返南非
呢個禮拜日告東尼搵馬偉昌去日本，騎「締造美麗」跑日本安田記念，理論上佢應該好開心，話晒跑國際一級賽嘛！不過咁，佢已決定跑埋今季離開香港，返去南非重新發展；早幾日 Helen撞到馬偉昌老婆Anna，佢話過埋呢個幾月，就有排都唔會再見，事關馬偉昌覺得下季留低，都唔會有太多支持，咁冇座騎，好難有乜大作為，與其係咁，不如一心一意返祖家，起碼可以幫到剛剛加入當地見習騎師行列嘅大仔，但Anna本身就唔係咁贊成，仲叫Helen勸吓佢老公。
Anna既係老婆，馬偉昌尚且一意孤行，咁Helen係外人，講嘢又點會聽得入耳？而且馬偉昌係大男人，行每一步必然有本身理由，更何況呢啲係佢哋家事，自問就唔多好意思插口；記得以往，久唔久就聽見馬偉昌話要走，但次次都冇成真，Anna話呢次馬偉昌好認真，唯一慶幸嘅，係馬會私下已同馬偉昌講，他日只要佢有興趣，隨時歡迎申請重臨，亦好容易再獲發牌。
今晚馬偉昌單騎一匹「飛天龍駒」，馬上次走得幾好，加程跑1200米，一於捧佢。
http://www.hkdailynews.com.hk/horse.php?id=160527
:kkkkk: :kkkkk: :kkkkk:
