巫斯義下季長期留港
上個禮拜日賽事真精采，巫斯義返嚟客串一天，直路賽贏「勁闖駒」嗰場，畀少少就霸番住條欄，原本想埋去嘅「御鋒」成隻彈番開，「勁闖駒」就此沿欄上前，跟手騎「喜蓮智星」盡顯步速智慧，見冇馬燒按慢嚟放，搞到後上都OK勁嘅「火熱動感」姍姍來遲，但最出色嘅，除咗騎「新力勁」好似揸電單車咁，左穿右插後上得第二，仍首推「好先生」同白德民「火龍駒」鬥足300米，呢啲咪叫跑馬囉！
當日散場，Helen一心落去騎師室，等阿巫出嚟同佢Say Hi，點知佢尾場冇馬跑，已經換衫走咗，打佢電話又唔通，可能返嚟一日咁多，冇換電話咭啩？其實遮打盃嗰日，Helen收到風，話阿巫下季向馬會申請全季留港策騎，即係話過埋暑期歐洲馬季，佢就會同法國說再見，疊埋心水在港騎足一季，咁當然，遇啱凱旋門大賽之類，隨時都可以返去。消息話，阿巫之所以咁大犧牲，係因為過埋下季，佢在港開倉做練馬師將可以成事，正因為咁，需要更多時間響度籌備，同馬主朋友打好關係；咁又係，過去兩年佢一路響法國，都有跟佢老友，當地著名練馬師羅迪普打好底，能力既唔成問題，在港攞牌，自然話咁易！
http://www.hkdailynews.com.hk/news.php?id=161379
真係咁快有牌?:bbbb: :aaaa:
