賽馬世界 - Powered by Discuz! Board

標題: (轉載)受薪董事唔易做 [打印本頁]

作者: May_Be_83 時間: 14/8/2012 12:51 PM 標題: (轉載)受薪董事唔易做

新角度：受薪董事唔易做

每當打風落雨馬伕拖住匹馬行沙圈，好多馬迷都會同情佢哋，日曬雨淋分分鐘捱到病，但最慘都唔係冒雨帶馬行圈，而係做到尾場近十二點先收工，休息幾個小時又要開工。係呀，馬房助理跑完夜馬後，幾個鐘頭後又要返馬房喇！

受薪董事同樣辛苦，每星期除咗賽日開跑前兩小時至賽後研訊同報告完結後要 On Duty 外，更要每周輪流晨操當值，真係唔係人人都頂得住。

周三無試閘就通常由見習受薪董事值班晨課，然後稍作休息就返夜馬；如果周六跑日馬，值班嘅董事就由早上四點半直踩到晚上七八點。而賽事期間都唔係好得閒，兩位見習董事及一位董事每場都要爬上四層高嘅攝影塔，着住畢挺西裝走來走去，尤其在夏天真係有機會中暑㗎！

還記得有一次 1000 米直路賽在大雨中進行，筆者在直路頭攝影塔拎住望遠鏡監察賽事，從草地跑道旁嘅車路越過草地已經襪都濕透，到了開閘至一半路程的數十秒間再令小弟背脊盡濕，餘下之一半路程則要迎面食雨，要知道望遠鏡沒有水撥，在滂沱大雨中監察賽事難度已高，騎師在陣上搏命難度更高，難怪天雨路滑時騎師跑轉彎路程特別小心。

其實每場沙田賽事，受薪董事們通常都會分佈在 1200 、 800 及 400 米的攝影塔，另外一位留在研訊室，大董則會在樓上廣播員室旁嘅董事室，以手提對講機監察賽事，亦要即時決定任何因獸醫建議或入閘困難馬之出賽權。

賽事完結後，各位董事便即時回到研訊室崗位集思廣益，向首席董事匯報任何特別事項，然後一同從多角度觀看巡邏影片，決定是否有研訊之需要。

======
其實筆者口中所講既辛苦，相比起馬房工作個班馬伕，後者咪仲辛苦？