標題: 騎師跌錢話咁易 [打印本頁]
作者:
mkwong 時間: 17/8/2010 01:04 PM 標題: 騎師跌錢話咁易
16/08/2010
「韋達$40,000、鄭雨滇$35,000、王志偉$10,000……」莫非各位騎師大發善心，齊齊排隊捐錢？非也，所指者其實係騎師們罰款身價！陣上打茅波犯規固然要罰，有時私下紀律問題，甚至太肉緊、太重秤一樣唔准，要乖乖打開荷包科水。雖則呢班綠茵場上天之驕子腰纏萬貫，但係水滴石穿，上季加加埋埋足足上繳真金白銀過百萬，真係戥佢哋肉赤！
六串一過到尾關，柏寶鞭發達心聲點會唔狠？盛惠五千大元！
韋達罰錢最多濕濕碎
十季冠軍騎師韋達有幾威？早已家知巷聞。上季此君不但頭馬No.1、獎金No.1，連罰款都係No.1！雖然全季佢只有三次以罰款代替停賽紀錄，不過貴為一哥，罰款當然唔可以輕手，結果埋單計數，韋達全季合共被罰款十六萬五千大元，冠絕同儕。年薪十六萬，可能已經係唔少80後年輕人可望而不可即嘅夢想數字，甚至某部分低下階層，隨時搵兩年都搵唔到；但係對於一季贏獎金高達九千萬嘅韋達嚟講，濕濕碎而已！
柏寶：唓，計次數我多過你啦！
柏寶過勇連番受罰
其餘罰款「十萬元戶」都係以前列騎師為主，本地薑鄭雨滇、蔡明紹連番不小心策騎被罰，損失不菲也。當中稀有分子乃前華廐主帥都爾，雖然佢成績一般排中下游，上季罰款之多卻高踞Big 4行列，人哋韋達八千幾萬獎金罰十幾萬，你贏得千六萬獎金又罰十零萬，女細老婆嫩呀都爾，今季小心喇！
韋達：講罰款我都係一哥，服未？（設計圖片及對白）
相對之下，澳洲騎師似乎比較注重陣上安全，例如潘頓全季只罰款一次，柏寶亦不過得兩次用罰款代停賽。不過柏寶雖然唔茅，衰在經常過勇，澳洲式車輪鞭甜在馬迷心，痛在馬兒身，先後四次被裁定用鞭不當，夾夾埋埋共九次被罰款，多過晒其他騎師。另外南非一族都好守規矩，勞愛德、馬偉昌、卓利雖然先後停過賽，但係從未因不小心策騎被罰款，其中卓利更加全季一毫子罰金都未交過，大師傅得佢一個保持清白之身，認真知慳識儉。
唔提抗議罰$5,000 最騎呢
騎師被罰款原因可謂五花八門，最常見當然係不小心策騎。另外陣上最有機會「出事」者都來自一條馬鞭，好似用鞭次數太多、舉鞭過高都可能被罰，柏寶正因為咁連番中招，今季馬會正有意喺賽事規例加入相關條文加以限制。至於跌鞭一、兩次可以賴唔覺意，但係跌到第四、五次就可能傷及荷包，上季衛韜禮、梁家俊都曾經因此而破財。
離開綠茵場上，騎師被罰款通常不外乎食兩家茶禮或者超磅之類。其餘較「騎呢」例子，仲包括薛順強喺騎師室食煙、蘇狄雄帶兩條馬肚帶過磅，另外韋達騎「美猴王」冇幫馬主同練馬師提出抗議，一樣要擺低五千銀！
卡士愈高罰得愈多錢
馬會多年前實施以罰款代替停賽制度，成為罰款收入最主要來源。呢個制度擺明「大細超」，成績愈好、賺錢愈多嘅騎師，用作交換一日停賽期之罰款就愈高，某程度其實代表咗騎師本身卡士。例如韋達、柏寶之類前列好手，當然列為上限四萬元級別；至於排名唔算最前嘅白德民，由於拍住大摩頻頻贏大賽豬籠入水，所以罰款身價高過排名更前嘅鄭雨滇。
杜利萊季尾大減價
至於各騎師罰款準則其實唔係一成不變㗎，根據成績起落，罰款身價亦有升有跌。例如出名騎功好嘅杜利萊，上季九月騎「無雙小子」被罰，要用四萬元換一日停賽，到五月騎「駿蹄飛」不小心，就只係罰三萬。至於鄭雨滇就更加海鮮價，一月「新力勁」罰三萬五，二月「幸運相架」只罰三萬，到四月「我跑得」用七萬換兩日，即係平均又上番三萬五蚊一日，起伏不定。
梁家俊紀律曳頻遭殃
見習騎師錢財未到手，唔可以用罰款換停賽，如上季冠軍見習生楊明綸被罰停賽廿二日之多，埋單罰款亦只係二千大元。通常牌仔被罰款都係涉及紀律原因，一次最多罰五千，上季罰款最多嘅梁家俊居然要交到三萬一千銀，可想而知呢位小將操行成績認真麻麻。
ON.CC
唔講唔知罰款都有升有跌,唔知準則點定呢...:eee:
作者:
西人堅 時間: 17/8/2010 01:19 PM
紀咩律姐....梁家俊 單係跌鞭都唔知罰左幾多啦
作者:
自由雨滇行 時間: 17/8/2010 01:40 PM
原帖由 西人堅 於 17/8/2010 01:19 PM 發表
紀咩律姐....梁家俊 單係跌鞭都唔知罰左幾多啦
其實再係咁可唔可以罰佢唔準帶鞭上陣:ooo:
作者:
DrEAm 時間: 17/8/2010 01:43 PM
比條後備鞭佢啦:yyy: 吾夠比多條,跌極都有:zzz:
| 歡迎光臨 賽馬世界 (http://racingworld.no-ip.org/) |
Powered by Discuz! 5.0.0 |