評馬人都要流眼淚？
不論做人做事都應該承擔責任，我支持政府的問責制，以往每次賽馬我都剪下一些名家貼士，當賽事結束，我便會對一對他們的成績，覆看他們的賽前評論，從中觀察他們對賽馬的認識有幾多，看看他們對馬迷、對報館的誠意，因為我和他們（評馬人）接觸的機會甚多，如果他們在工作方面馬虎，沒有熱誠，正所謂 「親君子而遠小人」，那麼便很難和他交往了。
我現時所講的說話，可能被馬經版同事或靠寫貼士稿謀生的人士XYZ？但在我當練馬師的期間，曾經有一種想法，評馬人的工資應該與他們的成績掛鈎，多中多得，唔中就攞梳蕉返屋企，再升一級便是自己出資投注，以示信心，報館或電視台再以同等或協議的金錢投注，Double or Nothing，資深評馬人如果真係咁堅就應該接受這個挑戰，贏咗咪風光囉，輸咗都捱唔得幾耐（倒貼），會自動消失，減薪或轉行。呢一種玩法就叫做「流眼淚」。
獎罰政策自我激勵
以前有馬主或投注人士跟我說，某某騎練的貼士好準（騎馬人都有人信），我回說，我樂意出資替該等人士投注，但他們的投注額不可以少於50個（萬），該等人士出資25個就可以啦（唔好話俾我聽賭得咁叻，但連25個都出唔起）另外，25個我俾，如果唔中，就大家都「流眼淚」，結果無人敢接受挑戰。練馬師要贏15場才算及格，咁評馬人要貼中幾多場頭馬或以累積贏到幾多彩金才算合格呢，唔好話一場裡面三、四個評馬家大家唱雙簧，你揀一我揀四啦，我聽見都肉麻。今時今日我跳出練馬師框框，站在中立的立場說句公道話，只知責人不識責己，大家一齊「流眼淚」咪啱囉。以上說話只是我自我約束，激勵自己，不是有心得罪各位前輩馬評家。莫怪莫怪！
方程式熱身後到位
第八場三班1200米，「旺當家」磅重位外，133磅排12檔，苦也！「新力飛」有點能力，但三班唔突出，要有良好因素支持才能夠贏，由於今場有能力的馬匹皆排檔不利，執死雞係時候了。「真誠真意」上仗第35場在全面性機會下競賽，只能跑第五名， 今場仲要孭129磅而排第11檔，如果因為莫雷拉而捧成熱門就唔抵囉。「雪風神駒」13戰只一勝，其餘三甲不入，我唔賭呢類馬，靠估嘅。「富貴榮華」壞咗，不可再憧憬往績。「勁有盈」今季初出， 太耐無跑，唔睇住。「勁飛駿」今季初出， 動態唔似。
「好老友」上仗97場排12檔係熱身賽事，以讓賽方式去跑，今場形勢有利，小小風吹草動（上仗79倍）便馬上跟進。「八心之鑽」又係壞咗，輸俾佢就當抽水啦。「上浦猛將」插班馬初出，看其往績有多少呃秤，在紐西蘭參賽時全部綁繫舌帶，以冷門身份參加一場一級賽及三級賽，所以在港都只係編69分，此馬一路交由楊明綸操練，幕後希望佢能掌握到馬性，小拖入三重彩無妨。「方程式」上季尾已顯示有競賽能力，上仗107場雖然初出，亦跑得有聲有色，今場佔盡形勢之利，賭WP。「帝聖駿駒」等降班。
呢場「方程式」WP，「新力飛」P，三重彩擺兩匹初出的插班馬「好老友」和「上浦猛將」博好分。
方塊龜、黃狗毛、生菜絲、卡樂B，你哋敢唔敢接受挑戰呀？
