35D許亦妮，除咗一雙銅鈴咁大嘅眼令人難忘，美好身段同樣令人無法抗拒——35，仲係D喎。最近更獲錢國偉賞識，搵佢拍《喜愛夜蒲3》，話就話唔係取代突然退出嘅DaDa陳靜啫，但戲份狂加，難怪就連雨僑都「酸到不得了」，二度開鏡嗰日係咁單單打打搶風頭。
有樣有身材嘅許亦妮，亦相當有計。今日有報道就影到，佢原來同霍啟剛老死、遺產基金過五億嘅漫畫家張樂平外孫詹勝「好好朋友」，就算家陣《夜蒲3》晚晚趕戲(好似今日咁，又通頂，拍到朝早9點)，許亦妮仍然抽空趕會呢位好朋友，繼續夜蒲。
究竟兩人點識嘅呢？據知本月20號，亦即是新片《重口味》首映當晚，許亦妮冇份演出，不過都有出席，仲跟大隊去埋after party。據今日篇報道話，當晚詹勝亦是座上客，許亦妮雖則滿場飛係咁識新朋友，但傾得最投緣嘅，都係同詹勝。
事隔一晚，約凌晨十二點幾左右，許亦妮同呢位新朋友，又落咗尖沙嘴棉登徑一間酒吧再傾過，許亦妮仲係啱啱趕完戲。報道話，今次係單對單約會，但睇張相詹勝好似同緊同枱另一人傾緊偈咁，而許亦妮就背鏡坐。事後詹勝話:「我冇媾許亦妮，許亦妮亦冇媾我，同佢入行前已經識，好朋友嚟啫!」哦，許亦妮愛夜蒲，都係為拍《夜蒲3》取經之嘛。哦!
