早兩日馬會出咗一段通告，應馬主要求，今季新馬「福駿寶」英文名已由原來Petaling Jaya Hall改為P J Hall，中文名字維持不變。一睇見個Hall字，好自然就諗起賀賢，佢英文名叫David Hall，咁啱「福駿寶」又係佢馬房，唔通馬主同佢有親，所以用個Hall字為名？本來想打電話畀佢八卦吓，醒起佢返咗澳洲，費事打擾佢，咁睇睇主人誰屬先？哦！原來係周福安。Helen幾年前去過馬來西亞玩，知道Petaling Jaya Hall係當地好有名嘅城市，但一般都叫P J Hall，好少人叫全名。咁周福安何許人？商界冇乜邊個唔識，佢喺馬來西亞出生，移居香港十幾廿年，效力嘅全部超級大碼頭，如嘉里建設（683）、思捷（330）、領匯（823），今年中就過檔岳少林建岳嘅麗新（488），主管旗下地產業務，至於Helen認識呢位仁兄，佢係參與嘅正途團體，即係「精彩遊戲」、「東方遊戲」馬主，不過聽聞佢只係柴娃娃，同啲老友一齊玩，依家自己養隻「福駿寶」，今後應該會多幾分投入啩！
講開正途團體，經理人Benson羅名下短途怪傑「盈彩繽紛」，自上年國際賽僅敗，距今已成年冇再出賽，健康情況似乎相當可慮，Benson話佢自己已打定輸數，只係等阿John蔡約翰發落，如果真係冇得搞，退役都唔係壞事。
始終都係搞唔番
