韋達罪魁禍首 12/08/2008
香港以往素有「騎師天堂」的美譽，事關獎金高、福利好，
而且只得沙田同快活谷兩個馬場，朝早操馬只在沙田進行，
不像外國般要穿梭多個馬場，生活優游得多。
不過近季情況逆轉，不少騎師都不再留戀此處，
導火線完全因為韋達這位八屆冠軍壟斷香港馬圈。
上季出現了一陣騎師逃亡潮，列高力、薛凱文、戴勝、杜鵬志等先後放棄牌照，
冼文諾及薄奇能今季亦拒絕再玩，大家都有點意興闌珊。
但那邊廂，韋達依然撈得風生水起，
差不多壟斷香港馬圈，騎師勢力失衡，
直接令到其他好手不願來港，若然情況未有改善，隨時又鬧騎師荒。
扎根深厚兵源不絕
韋達連贏八屆冠軍，影響力之大無出其右。
在港策騎超過十季的他，扎根深厚，
得到很多馬主及練馬師重用，上季便先後替十七個馬房贏馬，
可謂百足咁多爪，給他睇中的實力馬，
其他騎師難以沾手，因此一些來港日子不久的騎師惟有接一些實力較次的坐騎，
久而久之便萌去意。上季憑「雕塑家」捧走女皇盃的薛凱文曾經講過，
除非韋達不在港策騎，否則要他再申請來港客串，可能性極低。
馬會向來有條不成文規定，外籍騎師在港騎了一段時間，
便要離港「過冷河」，過一兩年才可再次申請來港，
無非是不想某些騎師坐大。雖然如果一位騎師因為成績好，
反而要懲罰他不獲發牌，實在不公平，
但事實證明騎師之間形勢失衡，難以向海外良將招手，
近季肯來港作短期客串而又具名氣的騎師已買少見少，印象中只得蘇銘倫而已。
海外好手不願來港
馬會董事葉澍义對這個情況亦感認同，他說：
「雖然韋達曾經替我名下的『得勝非凡』贏馬，但他在香港馬圈的勢力實在太大，
其他騎師不願來港或多或少因他而起，相信有關方面要諗諗計，令情況得以改善。」
壟斷情況嚴重
一人坐大影響生態
上季78次賽事產生了733場頭馬，韋達贏111場佔總數15%，
平均計日日都有馬贏，單睇一人數字，
未必察覺到其坐大情況，但比較埋其他騎師數字就一清二楚。
法國三雄（巫斯義、杜利萊及冼毅力）合三人之力亦只贏94場，
而前述六位已離港洋將（列高力、薛凱文、戴勝、杜鵬志、冼文諾及薄奇能）加埋亦僅得75W，
相比韋達一人獨佔111W，形勢明顯下風。
年搵千萬拍住任總
大家計一計韋達上季的收入，就知道其獨大情況有幾嚴重。
韋達上季勝出111場頭馬，單是獎金收入已接近八百萬，
加埋一百一十四萬策騎費，帳面總收入九百一十一萬，
如果再計埋馬主打賞，閒閒地都過千萬。
政府高官年薪又有幾多？特首曾蔭權年薪四百萬左右，
整個政府架構人工最高的金管局總裁任志剛，計埋花紅，
年薪約一千萬，至於早前鬧出滿城風雨的副局長職位，
年薪二百五十萬左右，而政治助理年薪約一百八十萬。
韋達年薪千萬，很多高官都望塵莫及。
賽事獎金乃固定數目，好似分餅仔，如果韋達獎金多，
即是話其他騎師可以分到的就會減少，試問又怎能吸引到其他騎師來港呢？
韋達雖連奪八屆冠軍，但對香港賽馬發展是否健康？
